पूर्ण सरकारी स्वामित्वको नेपाल एयरलाइन्सलाई कम्पनी मोडलरमा सञ्चालन गर्नका लागि नीतिगत काम अघि बढेको छ। एयरलाइन्सको सञ्चालक समितिले कम्पनी मोडलमा सञ्चालन गर्ने निर्णय गरेको छ।
समितिले यसका लागि कानूनी व्यवस्था गर्न भन्दै सरकारलाई सिफारिस गरेको छ।
सञ्चालक समिति सदस्य अच्यत पहाडीका अनुसार नेपाल एयरलाइन्सलाई कम्पनी मोडलबाट सञ्चालन गर्नका लागि सरकारलाई कानूनी व्यवस्था गर्न सिफारिस गरिएको छ। यसपछि संस्कृति पर्यटन तथा नागरिक उड्डयन मन्त्रालयले मन्त्रिपरिषदमा लिएर कानूनी प्रक्रिया सुरु गर्ने छ।
निर्णयअनुसार अहिले छुट्टै ऐनबाट सञ्चालित नेपाल वायुसेवा निगम कम्पनीमा दर्ता हुने छ। कम्पनीमा दर्ता हुनेबेलासम्म सम्पत्ति तथा दायित्वको मूल्यांकन भइसक्ने छ। त्यसपछि उक्त कम्पनीमा ७५ प्रतिशत नेपाल सरकारको हिस्सा हुने छ। २२ प्रतिशत सञ्चय कोष,नागरकि लगानी कोष तथा अन्य सरकारी संस्थाले लगानी गर्न पाउने छन्। बाँकी ३ प्रतिशत कम्पनीमा कार्यरत स्थाइ कर्मचारीले लगानी गर्न पाउने छन्।
तत्काल सर्वसाधारणका लागि सेयर भन्ने खुला हुने छैन।
संस्कृति पर्यटन तथा नागरिक उड्डयनमन्त्री योगेश भट्टराईले नेपाल एयरलाइन्स सुधारका लागि सुझाव दिन एक कार्यदल बनाएका थिए। उक्त कार्यदलले नेपाल एयरलाइन्सलाई कम्पनी मोडलमा लिएर सञ्चालन गर्न सुझाव दिएको छ।
उक्त सुझाव अनुसार नै यो प्रक्रिया अघि बढेको हो।
