सरकारले ३ महिनाका लागि पुग्ने चिनी मौज्दात रहेको जनाएको छ। सरकारको नियमित पत्रकार सम्मेलनमा बोल्दै वाणिज्य तथा आपूर्तिमन्त्री लेखराज भट्टले सर्वसाधारण आत्तिनुपर्ने अवस्था नरहेको बताए।
साल्ट ट्रेडिङसँग मात्रै अहिले ३ महिनालाई पुग्ने चिनी र १० महिनालाई पुग्ने नुन मौज्दात रहेको उनले बताए।
‘योबाहेक व्यवसायीहरुसँग पनि चिनी र नुनको रहेकाले आत्तिनु पर्ने अवस्था छैन’ उनले भने।
त्यस्तै केही दिनमा खाना पकाउने ग्यास पनि सहज हुने उनले बताए। पेट्रोलियम पदार्थको विक्रीवितरण नियमित रहेको र आपूर्तिमा समस्या नरहेको उनले बताए।
सरकारले नै सहुलियत पसल संचालनमा ल्याउने भएकाले उपभोक्तालाई कुनै पनि सामानको अभाव हुन नदिने उनले बताए।
आफूले यसअघि कालिमाटी फलफूल तथा तरकारी बजारको अनुगमन गरेको बताउँदै मन्त्री भट्टले फलफूल, तरकारीको नियमित आपूर्ति रहेको बताए।