कोरोना भाइरस संक्रमणको उच्च जोखिम बढेपछि सरकारले रोकथाम तथा नियन्त्रणका लागि भन्दै लकडाउन घोषणा गरेको छ। यसबाट सर्वसधारणको जस्तै अधिकांस क्षेत्रका व्यवसायीको दैनिकी पनि फेरिएको छ। नाफा घाटा,व्यापारिक मिटिङमै व्यस्त हुने उनीहरु आजभोलि प्राय घरभित्रै सिमित रहेका छन्।
सबैभन्दा धेरै व्यवसाय चौपट भएका पर्यटन व्यवसायीहरु त झन् नोक्सानीको हिसाब गर्दै बसेका छन्। तर सबै व्यवसायी पूरै निष्क्रियरुपमा बसेका हुँदैनन्। जस्तै पर्यटन व्यवसायी सुमान पाण्डे।
पाण्डे हेलिकप्टर,एयरलाइन्स,होटल तथा रेष्टुराँ लगायतका पर्यटनसँग सम्बन्धित सेवा व्यापारमा संलग्न छन्। पछिल्लो समय उनका सबै नियमित व्यापारमा ब्रेक लागेपछि केहीदिन उनी पनि सामन्य सहयोगको घोषणा तथा अन्य सर्वसधारणजस्तै घरभित्रै बसे।
तर केहीदिनपछि उनमा केही न केही गरौ भन्ने लाग्यो।
'व्यवसायी साथीहरुसँग मैले पहिला पनि केही गर्न सकिन्छ भने सयुक्त रुपमा गरौ भनेर अनुरोध गरे। तर कसैले चासो नदेखाएपछि यो बेला गर्न के सकिन्छ भनेर सोचे' उनले भने ' धेरै लगानी नचाहिने तर भएकै पूर्वाधाबाट गर्न सकिने जसको धेरै आवश्यकता पनि भएको चिज रहेछ महामारीको शंकास्पद वा संक्रमितलाई सेवा दिन स्वास्थ्य कर्मचारीका लागि आवश्यक पोशाक (पिपिई)। जुन हामी आफै बनाउन सक्छौ कि सक्दैनौ भनेर सल्लाह गरे। सकिने निष्कर्षमा पुगियो।'
पाण्डेले डाक्टर तथा जनस्वास्थ्य विज्ञसँगको सहकार्य तथा सल्लाहमा किटको डिजाइ बनाए। उनले फेसबकुमा उक्त डिजाइनका बारेमा प्रतिक्रिया पनि मागे। त्यसअनुसार उनले बनाउन थाले।
आजैमात्र उनले बनाएको किट राष्ट्रिय ट्रमा सेन्टरमा जाने छ। त्यहाँका डाक्टरले डिजाइन हेरेर स्वीकृत गरेका छन्। आफूले बनाएको भन्दा केही परिवर्तन गरेर डाक्टरहरुले मगाएको उनले जानकारी दिए।
पाण्डेले फेसबुकमा उक्त जानकारी गराएपछि देशभरका अस्पतालबााट माग भइरहेको छ। निजीदेखि सरकरीसम्मका सबै अस्पताल तथा डाक्टरहरुले माग गरेको उनले बताए।
'काठमाडौंको ग्रान्डी अस्पतालदेखि ताप्लेजुङको अस्पतालसम्मले माग गरेका छन् मलाई व्यक्तीगतरुपमा । हुन त सरकारले विदेशबाट सहयोग स्वरुप ल्याउन लागेको भनेको छ। तैपनी माग भएसम्म हामी आफै बनाएर दिनसक्ने भएका छौ' उनले भने।
यसमा उनलाई खासै लगानीको जरुरत परेन। ठमेलमा भएका गार्मेट अहिले व्यापार बिहिन छन्। त्यहाँ सिलाउने सिप भएकाहरु पनि छन्। किट बनाउन आबश्यक सामग्री पनि पाइन्छ। बिक्रीपछि तत्काल नगद पनि आउने भएकाले यसमा लगानी खासै आवश्यक पनि परेन।
दिनमा ५० ओटाजति बनाउन सकिने सुरुवाति क्षमता उनीसँग छ। यसमा माग र कच्चा पदार्थको आपूर्ति बढे संख्या पनि बढाउन सकिने उनको भनाइ छ।
व्यवसायको रुपमा भन्दा पनि खाली समयमाा केही सिर्जनशिल काम गरौ भनेर गरिएको पाण्डेले जानकारी दिए।
'यसमा मैले व्यापारको रुपमा हात हालेको होइन। यसमा धेरै नाफा लिने कुरा पनि छैन। देशले नै विदेशबाट सहयोग मागिरहेको कुरा हामी सबे मिलेर देशभित्रै बनाउन सकिन्छ कि भन्ने सन्देश दिन पनि मैले यो काम गरेको हुँ' उनले भने।
