चौधरी ग्रुपको कल्याणकारी संस्था चौधरी फाउन्डेसनले कोरोनाभाइरस रोकथाम र उपचारका लागि तीन चरणमा मुलुकभरका ११९ स्थानमा सुरक्षा र उपचार सामग्री वितरण गरेको छ ।
तीन चरणमा गरेर विभिन्न उपचार सामग्री वितरण गरिएको फाउन्डेसनका अध्यक्ष विनोद चौधरीले जानकारी गराएका छन्। संक्रमण फैले उच्च जोखिम बढेपछि आवस्यकताका आधारमा सामग्री वितरण सुरु गरिएको उनले बताए।
पहिलो चरणमा तत्काल पूर्वदेखि पश्चिमका ४८ वटा स्वास्थ्य केन्द्रमा स्वास्थ्यकर्मीका लागि सक्दो उपचार सामग्री र पीपीई उपलब्ध गराइएको चौधरीले जानकारी दिएका छन्। प्रदेश नम्बर १ अन्तर्गत अस्थायी कोरोना सेन्टर (विराटनगर), मेची अस्पताल, बीपी कोइराला स्वास्थ्य विज्ञान प्रतिष्ठान, उदयपुर जिल्ला अस्पताल, कोशी अस्पताललगायत स्थानमा पहिलो चरणमा सामग्री वितरण गरिएको थियो।
पहिलो चरणमै प्रदेश नम्बर २ का जानकी मेडिकल अस्पताल (जनकपुर), प्रादेशिक केन्द्र अस्पताल (जनकपुर), स्वाब परीक्षण प्रयोगशाला (जनकपुर), नारायणी अस्पताल (वीरगन्ज), कौडेना स्वास्थ्य केन्द्र (सर्लाही), मलंगवा अस्पताल (सर्लाही), राजबिराज अस्पताललगायत स्थानमामा पनि वितरण गरिएको फाउन्डेसनले जानकारी दिएको छ।
त्यसैगरी प्रदेश नम्बर ३ का कान्ति बाल अस्पताल, त्रिवि शिक्षण अस्पताल, वीर अस्पताल, टेकु अस्पताल, मनमोहन मेमोरियल हस्पिटल, पाटन स्वास्थ्य विज्ञान प्रतिष्ठान, माइती नेपाल, कोरोना उपचार केन्द्र (भक्तपुर), चितवन अस्पताल, हेटौंडा अस्पताल, सशस्त्र प्रहरी बल मुख्यालय, शिर अस्पताल (काभ्रे) लगायत स्वास्थ्य संस्थामा पीपीई उपलब्ध गराइएको थियो।
त्यस्तै, प्रदेश ४ अन्तर्गत नलवपरासीका मध्यबिन्दु अस्पताल, दुम्कौली स्वास्थ्य चौकी, पिताउन्जी स्वास्थ्य केन्द्र, प्रगतिनगर स्वास्थ्य केन्द्र र सहज अस्पताल, पोखराको मातृशिशु मितेरी अस्पताल, पर्वत/बागलुङ/गोरखा जिल्ला अस्पताललगायत स्थान पुगेर सुरक्षा सामग्री वितरण गरेको फाउन्डेसनले प्रदेश नम्बर ५ का भीम अस्पताल (भैरहवा), लुम्बिनी प्रादेशिक अस्पताल (रुपन्देही) आयुर्वेद अस्पताल (दाङ), प्रदेश प्रहरी अस्पताल (नेपालगन्ज), पाल्पा जिल्ला अस्पताल, रेउघा अस्पताल (रोल्पा), बर्दिया जिल्ला अस्पताल, देवदह क्वारेन्टिन सेन्टर (रुपन्देही), सहस्त्र प्रहरी अस्पताल (कोहलपुर) लगायत स्वास्थ्य केन्द्रमा पनि यी सामग्री उपलब्ध गराएको थियो।
दोस्रो चरणको सबैभन्दा ठूलो चुनौती परीक्षण किट देखिएकाले सोको वितरण गरिएको फाउन्डेसनले जानकारी दिएको छ। फाउन्डेसन आफैले सर्वेक्षण गरेर कसरकारलई १ हजार ‘पीसीआर रिएजेन्ट’ उपलब्ध गराइएको फाउन्डेशनले जानकारी दिएको छ।
तेस्रो चरणमा फाउन्डेसनले कर्णाली, सुदूरपश्चिम र प्रदेश नं. २ मा उपचार सामग्री वितरण गरेको थियो।
सुदूरपश्चिम प्रदेशका सेती अस्पताल (कैलाली), डडेलधुरा/दार्चुला/बैतडी जिल्ला अस्पताल, महाकाली नगरपालिकालगायत तथा कर्णाली प्रदेशअन्तर्गत प्रादेशिक अस्पताल (सुर्खेत), चौरजहारी अस्पताल (पश्चिम रुकुम)लगायत अन्य स्थानमा उपचार र सुरक्षा सामग्री फाउन्डेसनले उपलब्ध गराएको थियो।
प्रदेश नम्बर २ का जनकपुर, वीरगन्ज, सप्तरी, महोत्तरी, रौतहट, सर्लाही, सिरहा लगायत जिल्लाका अस्पताल तथा अन्य स्वास्थ्य केन्द्रमा सामग्री वितरण गरेपछि देशभरका कूल ११९ स्थानमा वितरण गरिएको फाउन्डेसनले जानकारी दिएको छ।
संसारभर भाइरस संक्रमणको रफ्तार तीव्र भएपछि नेपालमा के गर्न सकिन्छ भनेर फाउन्डेसन आफैले सर्वेक्षण गरेर सहयोगको रणनीति बनाएको फाउन्डेसनका अध्यक्ष विनोद चौधरीले जानकारी दिएका छन्।
'त्यतिबेला हामीलाई अनुभव भयो–– सबैभन्दा पहिलो प्राथमिकता स्वास्थ्यकर्मीको सुरक्षा हो । तर, यही पक्षमा ठूलो कमजोरी देख्यौं । हामीले विभिन्न क्षेत्र पुगेर सर्वेक्षण गर्यौं । स्वास्थ्यकर्मीका कुरा सुन्यौं । पूर्वाधार अभाव भएका कर्णाली, सुदूरपश्चिम र २ नम्बर प्रदेशका विकट स्थानमा कोरोना संक्रमणको जोखिम झनै उच्च थियो । किनकि यी क्षेत्रमा भारतबाट आएको ठूलो जनसंख्या बसोबास गर्दछ । ती प्रदेशका स्वास्थ्य केन्द्रमा कार्यरत स्वास्थ्यकर्मीको सुरक्षा अवस्था कमजोर थियो । उनीहरूको आत्मबल बलियो बनाउनुपर्ने आवश्यकता थियो' चौधरीले भनेका छन्।
आफूहरुले गरेको सहयोग पूर्ण नभए पनि स्वास्थ्यकर्मीको मनोबल उच्च राख्न यसले केही मद्दत पुगेको उनको विश्वास छ।
'हामीलाई थाहा छ–– माग र आपूर्तिको अनुपात हेर्ने हो भने हामीले उपलब्ध गराएका सामग्री थोरै हुन् । हामीले आफ्नो क्षमताले भ्याएसम्म थोरै भए पनि प्रयास गर्यौं । यस कुरामा हामीलाई सन्तोष लागेको छ' एक विज्ञप्ति जारी गर्दै चौधरीले भनेका छन्' हामीले देखेका छौं–– २०७२ को महाभूकम्प, पटक-पटक सताउने बाढीपहिरो, आगलागीजस्ता आकस्मिक प्राकृतिक विपत्तिसँग जुध्न सक्ने हाम्रो क्षमता अत्यन्त कमजोर छ । यस्ता दुर्घटना भएपछि मात्र हामी चनाखो हुन्छौं । पूर्वाधार, उपकरण र जनशक्ति जुटाउन लागिपर्छौं । विपत्तिको कहर सकिएपछि हामी चुपचाप सेलाउँछौं । यी दुर्घटनासँग जुध्न आवश्यक पूर्वाधार, उपकरणको जोहो गर्न बिर्सिन्छौं । त्यसैले मुलुकका सातै प्रदेशमा सरकारी/गैरसरकारी निकाय र निजी क्षेत्रको सहभागितामा प्रकोप व्यवस्थापन संयन्त्र स्थापनाका लागि प्रयास थालिनुपर्छ । यस्तो संयन्त्र जसले यस्ता विपत्ति आउनासाथ तत्काल आफूलाई ती क्षेत्रमा पुर्याउन सकोस् । त्यहाँका पीडितलाई सुरक्षित स्थानमा ल्याउन सकोस् । र, उनीहरूलाई तत्काल उपचार गर्न सकोस्।'
कोरोनासँग जुध्नका लागि सरकारले पनि आफ्नो क्षमता विस्तार गरिरहेको र अव परीक्षण तथा व्यवस्थापनको रफ्तार तीव्र हुने चौधरीको विश्वास छ।
