भारतका तीनमध्ये दुई कम्पनीले र्यापिड टेस्ट किट उत्पादन सुरू गरेको छ।
औषधि तथा चिकित्सकीय साधन निर्माणको नियमन गर्ने भारतको केन्द्रीय औषधि गुणस्तर नियन्त्रण संगठनले अनुमतिपत्र जारी गरेपछि उनीहरूले उत्पादन सुरू गरेका हुन्।
भारत सरकारले चीनबाट मगाएको र्यापिड टेस्ट किट अझै आइपुगेको छैन।
अप्रिल ५ सम्म भारत आइपुग्नुपर्ने किट त्यसपछि दुई पटक तोकिएको समयमा नआएपछि भारतले आफैं उत्पादन सुरू गर्न लागेको हो।
भारतीय चिकित्सा अनुसन्धान परिषद् (आइसिएमआर)ले दिल्लीका तीन कम्पनीले बनाएको आरटी केको नमूनालाई यसै महिनाको सुरूमा मान्यता प्रदान गरेको थियो।
उसले नयाँ दिल्लीस्थित भेनगार्ड डायग्नोस्टिक्स, केरलाको सरकारी एचएलएल लाइफकेयर लिमिटेड र गुजरातको भोक्सटुर बायो लिमिटेडले उत्पादन अनुमतिका आवेदन दिएका थिए।
यीमध्ये एचएलएल र भोक्सटुरले उत्पादन सुरू गरेका हुन्। उनीहरूले अप्रिल २० सम्म पहिलो ब्याचमा एक लाख आरटी के तयार पार्नेछन्।
यस्तै भेनगार्डले अबको तीन हप्ताभित्र उत्पादन सुरू गर्ने योजना बनाएको छ।
'हामीले अप्रिल १३ मा सिडिएसिसओबाट स्वीकृति प्राप्त गरेसँगै किट उत्पादन सुरू गर्यौं। हामीसँग एक हप्तामा एक लाख परीक्षण किटहरू उत्पादन गर्ने क्षमता छ। हामी एक हप्ताभित्र आइसिएमआरलाई यसको आपूर्ति गर्नेछौं', एचएलएल लाइफकेयर लिमिटेडका एक वरिष्ठ कार्यकारीले नाम नछाप्ने सर्तमा हिन्दुस्तान टाइम्सलाई भने।
किट बनाउन प्रयोग हुने केही सामान भने अमेरिकाबाट मगाएको उनले बताएका छन्।
भोक्सटुर बायो लिमिटेडले भने किट विकास गर्न स्वदेशी कच्चा माल प्रयोग गर्दैछ।
'हामीले चीन वा अन्य कुनै देशसँग केही गर्न सकेनौं। हामी आफ्नै पहलमा किट र कच्चा माल निर्माण गर्दैछौं', भेष्टरका सिइओ र प्रबन्ध निर्देशक खुश्रू पास्ताकियाले भने, 'हामीसँग एक महिनामा १० करोड किट उत्पादन गर्ने क्षमता छ र आवश्यक परेमा यसलाई दोब्बर गर्न सकिन्छ। तर हामीले विक्रेता र वितरकहरूको खोजी गर्नुपर्नेछ र अन्य प्रबन्ध गर्नुपर्नेछ। त्यसैले अनुमतिपत्र पाएको दिनदेखि उत्पादन सुरू हुन १०-१२ दिन लाग्छ।'
