कोरोनाका कारण संसारभरको अर्थतन्त्र मन्दीमा जाने बहुपक्षीय वित्तीय संस्थाहरुले प्रक्षेपन गरिरहेका छन्। अन्तर्राष्ट्रिय मुद्रा कोषले सन् १९३० को महामन्दीपछिकै खराब अवस्थामा विश्व अर्थतन्त्र झर्ने अनुमान गरेको छ।
विश्व बैंक तथा मुद्रा कोषमात्र नभएर संसारभर अहिले भइरहेका कोरोना प्रभाव मूल्यांकनहरुले अर्थतन्त्र भित्र पनि पर्यटनमा आधारित उद्योग व्यवसाय धेरै प्रभावित हुने निष्कर्ष निकालेका छन्।
कोरोना रोकथामका लागि संसारभर सामाजिक दुरी कायम गरिएको छ। यसबाट यात्रा प्रतिबन्ध लगाइएको छ। यात्रा प्रतिबन्ध लागेपछि एयरलाइन्स,होटल तथा अन्य सम्बन्धित उद्योगहरु स्वभाविक रुपमा प्रभावित हुन्छन्। अन्तर्राष्ट्रिय एयर ट्रान्सपोर्ट एसोसिएसन(आयटा)ले एसिया प्यासेफिक क्षेत्रमा मात्र एयरलाइन्सहरुले सन् २०१९ को तुलनामा ४४ प्रतिशतसम्म न्यून यात्रुमात्र पाउने अनुमान गरेको छ।
यो क्षेत्रका सबै देशका एयरलाइन्सहरुले यो वर्ष नोक्सानी बेहोर्ने भएकाले सरकारहरुले राहत प्याकेज ल्याउनुपर्ने आयटाको तर्क रहेको छ। सबैभन्दा बढी तरलता(नगद)चाहिने एयरलाइन्सहरुले कोरोना सकिने वित्तिकै नगद संकट बेहोर्ने भएकाले सरकारहरुले तत्काल सोच्नुपर्ने आयटाको भनाइ छ।
सन् २०२० को ६ महिनाभित्रै यो क्षेत्रका एयरलाइन्सले ३९ अर्ब गुमाउने र वर्षभर कम्तिमा ८८ अर्ब डलर गुमाउने आयटाको प्रक्षेपन छ।
आयटाले नेपाली एयरलाइन्सहरुले ३९ प्रतिशत न्यून यात्रु पाउने अनुमान गरेको छ। यो भनेको २६ लाख न्यून यात्रु हो। नेपाली एयरलाइन्सहरुले यो वर्ष अघिल्लो वर्षको तुलनामा ४० अर्ब बढी रुपैयाँ नोक्सानी बेहोर्ने आयटाको प्रक्षेपन छ। आयटाका अनुसार एयरलाइन्स र यो सँग जोडिएका कूल १ लाख बढी रोजगारीहरु प्रभावित हुने छन्।
