देशव्यापी लकडाउनका कारण भारतमा पेट्रोलियम पदार्थको खुद्रा बिक्री ५० प्रतिशतले घटेको छ।
भारतमा अप्रिलको पहिलो दुई सातामा अघिल्लो सालको तुलनामा ५० प्रतिशतले कमी आएको हिन्दुस्तान टाइम्सले जनाएको छ।
अप्रिलको पहिलो १५ दिनमा राज्यका खुद्रा बिक्री केन्द्रहरुको बिक्री एक बर्ष अघिको तुलनामा ६१ प्रतिशतले घटेको छ भने पेट्रोल र जेट ईन्धनको बिक्री ६४ र ९४ प्रतिशतले घटेको छ।
यसमा ईन्धन तेल, बिटुमेन र खाना पकाउने ग्यासको खपत समावेश छ।
अन्तर्राष्ट्रिय उर्जा एजेन्सी (आईईए)ले निकालेको रिपोर्ट अनुसार भारतको वार्षिक ईन्धन खपत ५.६ प्रतिशतले गिरावट आउने छ। यस अघि मार्चको रिपोर्टमा यो २.४ प्रतिशतले घट्ने पूर्वानुमान गरिएको थियो।
भारतमा पेट्रोलको माग ९ प्रतिशतले घट्ने अनुमान गरिएको छ भने डिजेलको मागमा ६.१ प्रतिशतले कम हुने अनुमान छ।
कोरोना भाइरसका कारण विश्वका थुप्रै मुलुक लकडाउनमा गएपछि संसारभर पेट्रोलियम पदार्थको खपत घटेको छ।
यसैको परिणाम स्वरुप पेट्रोलियम पदार्थ उत्पादक देशहरूबिच उत्पादनमा १० प्रतिशतले कटौती गर्ने सहमति भएको छ।