सयुक्त राज्य अमेरिकाको नागरिक उड्डयन नियमक फेडरल एभिएसन एड्मिनिस्ट्रेसन(एफएए)ले त्यहाँका यात्रुबाहक जहाजका सिट हटाएर कार्गो उडान गर्नका लागि अनुमति दिएको छ।
कोरोनाका कारण यात्रु उडान गर्ने एयरलाइन्सका जहाज ग्राउन्डेड भइरहेका छन्। नियमक निकायले एयरलाइन्सहरुलाई यात्रु बस्ने सिट हटाएर त्यसमा वस्तु ढुवानी गर्नका लागि अनुमति दिएको हो।
कोरोना महाहमारीका कारण मेडिकल सामग्रीकै ढुवानी धेरै गर्नुपर्ने भएको र त्यसका लागि जहाज नै उपयुक्त हुने भन्दै प्रशासनले एयरलाइन्सहरुलाई सिट हटाएर कार्गो जहाज बनाउने अनुमति दिएको सिएनएनमा समाचार छ।
नियमकले सिट हटाउने अनुमति दिएपनि त्यसमा कार्गो उडान गर्नका लागि एयरलाइन्सहरुलाई सहज भने छैन। किन भने कार्गो कम्पार्टमेन्टमा हुनुपर्ने प्रविधि यात्रु कम्पार्टमेन्टमा राखिएको हुँदैन। सबैभन्दा पहिला एयरलाइन्सले त्यसको व्यवस्थापन गर्नुपर्ने छ। त्यसपछि जहाजमा चाहिले वेट व्यवस्थापन अर्को चुनौति हुने छ।
यसअघि क्यानडाका एयरलाइन्सहरुले पनि यात्रुबाहक जहाजलाई कार्गो जहाज बनाएका थिए।
नेपालमा पनि नेपाल एयरलाइयन्सका वाइडबडी जहाजले कार्गो उडान गरिरहेका छन्। नेपालमा भने कार्गो कम्पार्टमेन्टमा मात्र राखेर सामग्री ढुवानी भइरहेको छ। सिटमाथि राख्ने वा सिट राख्ने अनुमति यहाँ दिइएको छैन।