उद्योगी व्यवसायीले विद्युतमा सहुलियत दिन आग्रह गरेका छन्।
नेपाल उद्योग वाणिज्य महासंघकी अध्यक्ष भवानी राणाको नेतृत्वमा नेपाल उद्योग परिसंघका अध्यक्ष शतिस कुमार मोर र नेपाल चेम्वर अफ कमर्सका वरिष्ठ उपाध्यक्ष राजेन्द्र मल्लसहित तीनवटै संस्थाका पदाधिकारीहरू सम्मिलित प्रतिनिधिमण्डलले उर्जामन्त्री वर्षमान पुन समक्ष आज उर्जा मन्त्रालयमा भेटघाट गरेको हो।
कोरोना भाइरस महामारीले उद्योग व्यवसाय नै संकटमा परेको भन्दै व्यवसायीले उद्योग क्षेत्रलाई सहयोग गर्न आग्रह गरेका छन्।
महासंघका निवर्तमान अध्यक्ष पशुपति मुरारका, वरिष्ठ उपाध्यक्ष शेखर गोल्छा, उपाध्यक्ष चन्द्रप्रसाद ढकाल, परिसंघका वरिष्ठ उपाध्यक्ष विष्णु कुमार अग्रवालसहित निजी क्षेत्रका उद्यमी व्यवसायीहरूको सहभागिता रहेको सो अवसरमा अहिलेको कोरोना संकटमा उद्योग व्यवसायलाई दुई वर्षसम्मका लागि विद्युतमा २० प्रतिशत छुट दिन माग गरिएको छ।
सो अवसरमा निजी क्षेत्रका उद्योगहरू बन्द रहेका र उनीहरुले विद्युत प्रयोग समेत नगरेकाले विद्युत प्राधिकरणले कम्तिमा चार महिनाका लागि डिमान्ड चार्ज छुट दिन समेत मन्त्री पुनः समक्ष आग्रह गरिएको छ।
साथै बक्यौता महसुल तिर्न चार महिनाको अवधि दिइनुपर्ने र उक्त अवधिका लागि जरिवाना समेत नलिन आग्रह गरिएको
छ।
सो अवसरमा प्रतिनिधिमण्डलकातर्फबाट विभिन्न जिल्लाहरूमा निर्माण भैरहेका जलविद्युत आयोजनाहरूको निर्माणमा विभिन्न वहानामा अवरोध हुँदै आएकाले निर्माण कार्यलाई निरन्तरता दिन स्थानीयस्तरमा समन्वय गरी सहयोग गर्न पनि आग्रह गरिएको थियो।
निजी क्षेत्रका तीन ओटै संस्थाहरूले अहिलेको संकटको अवस्थामा उद्योग व्यवसायसहित समग्र अर्थतन्त्रको पुनरुत्थानका लागि मौद्रिक, श्रम तथा रोजगार, विद्युत क्षेत्रमा आवश्यक नीतिगत सुधारका लागि सुझाव तयार गरी सरकारका विभिन्न निकायहरूमा बुझाएका छन्।
