ट्याक्सी चलाउन पाउनुपर्ने माग राख्दै गत मंगलबारदेखि सुरु भएको चालक तथा व्यवसायीको आन्दोलन स्थगित भएको छ।
अखिल नेपाल यातायात मजदुर संघ, ट्याक्सी विशेष समिति र उपत्यका ट्याक्सी व्यवसायी तथा चालक सेवा समाजले संयूक्त रुपमा प्रेस विज्ञप्ति जारी गर्दै आन्दोलनका सबै कार्यक्रम फिर्ता लिइएको जनाएका छन्।
सम्बन्धित निकायले केही समयभित्रै ट्याक्सी संचालन कार्यविधि बनाएर संचालन गर्न दिने प्रतिवद्धता जनाएको र कोभिड १९ संक्रमणको जोखिमलाई पनि मध्यनजर गर्दै आन्दोलनका सबै कार्यक्रम स्थगित गरिएको विज्ञप्तिमा उल्लेख छ।
तर विज्ञप्तिमा भनिएजस्तो नभई आन्तरिक विवादले नै आन्दोलन भाँडिएको सम्बद्ध व्यवसायी बताउँछन्।
छलफलबिनै बाहिरी व्यक्तिलाई बोलाएर भाषण गर्न लगाइएका कारण आन्दोलन रोकिएको अखिल नेपाल यातायात मजदुर संघ, ट्याक्सी विशेष समितिका उपाध्यक्ष रविन्द्र भुपाल प्रधानले जानकारी दिए।
‘छलफलबिनै उपत्यका ट्याक्सी व्यवसायी तथा चालक सेवा समाजका अध्यक्ष सानु पुर्वछाने मगरले ज्ञानेन्द्र शाहीलाई बोलाएर भड्काउ भाषण दिन लगाउनु भयो। ब्यानरमा रहेको हाम्रो संस्थाको नाम टेपले छोपियो, हाम्रो झण्डा च्यातियो, हात हालाहालको स्थिति आयो त्यही भएर हामीले साथ छोड्यौँ’ उनले भने।
यी विषयका गल्ती स्वीकारेर रिले अनसनको लागि आफूले तयारी गरे पनि मगरले अचानक गएर आन्दोलन अन्त्यको घोषणा गरिदिएको प्रधानको आरोप छ।
यो विषयमा अध्यक्ष मगरसँग समाजकै पदाधिकारी समेत रुष्ट रहेको उपत्यका ट्याक्सी व्यवसायी तथा चलक सेवा समाजका एक पदाधिकारीले बताए। ‘हाम्रै अध्यक्षको गल्ती छ, उहाँलाई अध्यक्षबाट निलम्बन गर्ने हाम्रो तयारी छ,’ स्रोतले भन्यो।
आफूले कुनै पनि बाहिरी व्यक्तिलाई नबोलाएको अध्यक्ष मगरले दावी गरे।
‘ट्याक्सीको विषयमा कसैले बोल्छु भन्यो भने कसरी रोक्नु। मलाई कसैले निलम्बन गर्यो भने पनि मतलब छैन। पछि उहाँहरु आफै पछुताउनु हुन्छ,’ मगरले सेतोपाटीसँग भने।
याे पनि हेर्नुस्
ट्याक्सी चालकको सडकमै ब्रेकफास्ट, सडकमै डिनर (भिडिओ)