'फेयर एन्ड लभ्ली'को नयाँ नाम 'ग्लो एन्ड लभ्ली'

एजेन्सी

काठमाडौं, असार १९

चर्चित क्रिम 'फेयर एन्ड लभ्ली'ले आफ्नो नाम परिवर्तन गरेको छ। यसले आफ्नो नामबाट फेयर शब्द हटाएर 'ग्लो एन्ड लभ्ली' नाम राखेको हो।

बिहीबार युनिलिभर कम्पनीले आफ्ना क्रिमबाट फेयरनेस, ह्वाईटनिङ जस्ता शब्दहरू हटाएर 'ग्लो एन्ड लभ्ली' र पुरूषले प्रयोग गर्नेको नाम 'ग्लो एन्ड ह्यान्सम' राखेको हो।

पछिल्लो समय चलेको ‘ब्ल्याक लाइभ्स म्याटर’ अभियानका बीच युनिलिभरले आफ्ना क्रिममा प्रयोग हुँदै आएका 'फेयरनेस', 'लाइटनिङ', 'ह्वाइटनिङ' जस्ता विभेदपूर्ण शब्द हटाउने निर्णय गरेको थियो।

गत मे २५ मा अफ्रिकी मूलका अमेरिकी नागरिक जर्ज फ्लोयडलाई नियन्त्रणमा लिन मिनिसोटाका एक प्रहरी अधिकारीले घाँटीमा घुँडाले थिचेका थिए। फ्लोयडले सास फेर्न नसकेको बताए पनि प्रहरीले नछाडेपछि उनको ज्यान गएको थियो।

उक्त भिडिओ सार्वजनिक भएदेखि अमेरिकामा नश्लभेदविरूद्धको आन्दोलन चर्किएको थियो। आन्दोलनका क्रममा दासप्रथासँग सम्बन्धित केही सालिकहरू पनि ढलाइएका थिए।

युनिलिभरद्वारा उत्पादित क्रिमहरूमा प्रयोग गरिएका शब्दबारे पनि चर्को आलोचना भएको थियो।

यस्ता क्रिमले गोरो बनाउने, अनुहारको चमक बढाउनेलगायतले रङ्गभेदी कुरालाई बढवा दिने भन्दै आलोचना भएपछि युनिलिभरले यी शब्द हटाएर नयाँ नाम राखेको हो।

आलोचनाकै बीचमा 'डोभ' साबुनको 'एल ओरियल' कम्पनीले पनि ह्वाईटनिङ, फेयर, फेयरनेस जस्ता शब्दहरू हटाएको थियो।

प्रकाशित मिति: शुक्रबार, असार १९, २०७७ ०३:२२

सिफारिस