विगत छ महिनादेखि नेपालमा भारत पेट्रोलियम कर्पोरेसन लिमिटेडले बिटुमिन पठाउन सकेको छैन ।
कोभिड १९ को समस्याले भारत पेट्रोलियम कर्पोरेसन लिमिटेडले (बिपी सिएल) नामको बिटुमिन नेपाल पठाउन नसकेको भन्दै नेपालका लागि आधिकारिक विक्रेता पाइनियर नेपाललाई पत्राचार नै गरेको छ।
तर भारत पेट्रोलियम कर्पोरेसन लिमिटेडले उत्पादन गरेको भन्दै नक्कली बिटुमिन धमाधम नेपाल भने आयात भइरहेको छ।
अन्य ब्राण्डको बिटुमिनको ढकनीमा भारत पेट्रोलियम कर्पोरेसन लिमिटेडको उत्पादन बिपी सिएलको ढकनी हालेर नेपाल भित्रिरहेको खुलेको हो।
भारतबाट नेपाल प्रवेश गर्न लागेको बिटुमिन बोकेको ट्रकलाई भारतीय भन्सारले रोकेर जाँच गरेपछि यस्तो खुल्न आएको हो।
भारतीय भन्सारले शनिबार नेपाल आउन लागेको सिजी ०४ जेसी ७७८७ नम्बरको भारतीय ट्रकलाई नियन्त्रणमा लिएपछि नेपालमा नक्कली बिटुमिन भित्रिरहेको खुलेकोे हो।
सो ट्रकले नेपाल ल्याउन लागेको बिटुमिनको ढकनीमा भारत पेट्रोलियम कर्पोरेसन लिमिटेडले उत्पादन गरेको भन्दै विपी सिएलको ढकनी हालिदिएको फेला परेको हो।
नेपालमा बिपी सिएलको भन्दै नक्कली बिटुमिन पठाउने भारतीय कम्पनी के पेक्स टु इन्टरप्राइजेज हो।
नेपालमा भने शुभ श्री सिद्धी गणेश नामको कम्पनीले आयात गरिरहेको छ । शुभ श्री सिद्धी गणेश नामको कम्पनीले अन्य कम्पनीको बिटुमिन भन्सारमा ल्याइ बिपी सिएलको भन्दै नेपाल भित्र्याउने गरेको खुल्न आएको छ।
नेपालमा भारत पेट्रोलियम कर्पोरेसन लिमिटेडको उत्पादन बिपी सिएल नेपाल ल्याउने एक मात्र अधिकृत विक्रेता पाइनियर नेपाल हो।
साधारण ब्राण्डको बिटुमिनमा बिपी सिएल भन्दै नेपाल ल्याउँदा नेपालमा कसैले छानविन गरेको छैन । इनभोइस अनुसार प्याकिग नमिलेता पनि भन्सारबाट लुकाइ छिपाइ बिटुमिन नेपाल ल्याउने काम भइहेको छ।
अप्रिल एक देखि नेपालमा बिपी सिएलको बिटुमिन ल्याउन सकिएको छैन, पाइनियर नेपालका निर्देशक पारितोष गुप्ताले भने, अरु बिटुमिनको नाममा बिपी सिएलको ट्याग लगाएर नेपाल भित्रिरहेको छ।
भन्सारबाट ती सामान कसरी छुट्छन, गुप्ताले आश्चर्य मान्दै भने, अब हामी नक्कली बिटुमिन ल्याउने विरुद्ध कानुनी उपचार खोज्ने छौं ।
गुप्ताले बिपी सिएलद्धारा उत्पादित भिजि १० र भिजी ३० ग्रेडका नक्कली प्याकमा बिपीसिएलको लोगो अनाधिकृत रुपमा प्रयोग भइ विक्री भइरहेको भन्दै सचेत रहन ग्राहक र निमार्ण ब्यवसायीलाई आग्रह गरे।
उनका अनुसार अहिले बिपी सिएलको भन्दै बजारमा विक्री भइरहेका बिटुमिन नक्कली र गुणस्तरहिन हो।
नेपाली बजारमा बिपी सिएलको ब्राण्ड भन्दै नक्कली बिटुमिन विक्री भएपछि पाइनियर नेपालले यस विषयमा भारत पेट्रोलियम कर्पोरेसन लिमिटेडलाई औपचारिक रुपमा जानकारी गराइसकेको छ।
भारत पेट्रोलियम कर्पोरेसन लिमिटेडले यस विषयमा छानबिन भइरहेको उत्तर पाइनियर नेपाललाई दिएको छ।
