नेपाल उद्योग वाणिज्य महासंघको ५४औं वार्षिक साधारणसभा तथा निर्वाचन आगामि मंसिर ११ र १२ गते काठमाडौंमा हुने भएको छ । गत चैतमा हुनुपर्ने निर्वाचन कोभिड–१९ का कारण तीन पटकसम्म मिति तोकेर पनि हुन सकेको थिएन ।
महासंघको विहिबार बसेको कार्यकारिणी समितिको बैठकले ५४औं वार्षिक साधारणसभा तथा निर्वाचनको मिति तोकेको हो ।
“आज बसेको कार्यसमितिको बैठकले महासंघको साधारणसभा तथा निर्वाचन आगामि मंसिर ११ र १२ गते काठमाडौंमा गर्ने निर्णय गरेको छ । ठाउँको हकमा प्रज्ञा भवन तथा राष्ट्रिय सभा गृहमा महासंघको सचिवालयले कुरा गरिरहेको छ । ठूलो र खुल्ला ठाउँ आवश्यक पर्ने भएकोले निर्वाचन समिति र महासंघको सचिवालयले अध्यक्षज्यूसँग सरसल्लाह गरी ठाउँ निश्चित गर्नेछ ” महासंघका उपाध्यक्ष चन्द्रप्रसाद ढकालले भने।
महासंघलाई निर्वाचन तथा साधारणसभा गर्न गृह मन्त्रालयले अनुमति दिइसकेको छ।