नेपाल र इन्डोनेशियाबीच द्विपक्षीय हवाइ सम्झौताको तयारी भइरहेको छ। दुई देशबीचको सम्झौताका लागि एक आपसमा सूचना आदानप्रदान भइरहेको संस्कृति पर्यटन तथा नागरिक उड्डयन मन्त्रालयले जानकारी दिएको छ।
कोरोना महामारी सुरु हुनुअघि नै सम्झौताका लागि औपचारिक प्रक्रिया सुरु भएको थियो। लकडाउनका कारण रोकिएको छलफल पछिल्लो समय फेरि सुरु भएको मन्त्रालयका सहसचिव बुद्धिसागर लामिछानेले जानकारी दिए।
इन्डोनेशिया आफैंले सम्झौताका लागि रुची देखाएको थियो।
विशेषगरी इन्डोनेशियाको गरुडा एयरलाइन्सले नेपालमा उडान गर्न खोजेपछि सम्झौताको प्रस्ताव उतैबाट आएको हो।
कुनै पनि दुई देशबीचमा व्यावसायिक उडान हुनका लागि पहिला सम्झौता भएको हुनुपर्छ। यसरी सम्झौता भएपछि दुबै देशका एयरलाइन्सले एक आपसका देशमा पाउने पहुँच निर्धारण हुन्छ। यसमा कुनै पनि देशका एयरलाइन्सले कति उडान गर्न पाउने, कुन–कुन विमानस्थलमा उडान गर्न पाउने जस्ता विषय निर्धारण हुन्छन्।
सम्झौता भएपछि इन्डोनेशियाको राष्ट्रिय ध्वजाबाहक गरुडाले काठमाडौंमा सिधा उडान गर्न खोजेको छ। उसले उडान गर्नका लागि नेपालमा एजेन्ट पनि नियुक्त गरिसकेको छ। अहिले नै व्यावसायिक उडान गर्न नमिल्ने भएकाले अफलाइन एजेन्सीका रुपमा सोसाइट ट्राभल इन्टरनेशनललाई नियुक्त गरेको छ।
नेपालले हालसम्म ४० देशसँग सम्झौता गरिसकेको छ। पछिल्लो सम्झौता अष्ट्रेलियासँग भएको थियो।
