पर्यटकीय राजधानी पोखरामा अर्को नयाँ बन्जी थपिएको छ। बन्जी नेपाल एड्भेन्चर्स प्रालीले पोखरा, रातोपैरामा (माउन्टेन म्युजियमको आडैमा) बनाएको बन्जीको सफल परीक्षण गरिएको छ।
लेक साइडबाट करिब तीन किलोमिटर दुरीमा रहेको बन्जी नयाँ वर्षसँगै सञ्चालनमा आउने बताइएको छ।
सन्तोष भट्टराई अध्यक्ष रहेको कम्पनीमा राजु कुँवर, अशोक गुरुङ, दुर्गादत्त खरेल, दिल गुरुङ, दामोदर बराल, भूपाल बहादुर बराल क्षेत्रीको ८ करोड २५ लाख लगानी रहेको बताइएको छ।
क्यान्टिलिभर ब्रिजको डिजाइनमा बनाइएको ३५ मिटर अग्लो टावरको फेदबाट बन्जी जम्पका लागि ५५ मिटर लामो प्लेटफर्म निर्माण गरिएको छ।
सेती नदीको खोंचमा बनेको र फराकिलो हिमशृङ्खला हेर्दै जम्प गर्न पाइने भएकाले बन्जीमा आकर्षण बढ्ने भट्टराईको दाबी छ।
बन्जीको दुइटा प्लेटफर्म नदीदेखि १०१ र १०५ मिटरमा छन्। दुई फरक उचाइमा जम्प गर्ने नेपालको पहिलो जम्प साइट भएको उनले बताए।
साधारण बन्जी १०१ मिटर अग्लो प्लेटफर्मबाट गराइने र साइकल जम्प, बकेट जम्प लगायत विशेष जम्प १०५ मिटर अग्लो प्लेटफर्मबाट गराइने छ।
बञ्जी आइएसओ स्टाण्डर्डमा निर्माण गरिएको भट्टराईको दाबी छ। अन्तर्राष्ट्रियस्तरमा बन्जीको लोकप्रिय नाम ‘गो बन्जी’ सँगको फ्रेन्चाइज भएकोले गो बन्जीकै प्राविधिक सहयोगमा आइएसओ स्ट्यान्डर्ड अनुसार तयार गरिएको भट्टराई बताउँछन्।
एड्भेन्चर भएकोले सुरक्षा सावधानीमा जोड दिँदै पेट्जल र मामुट कम्पनीका हार्नेस लगायतका उपकरण प्रयोग गरिएको छ।
परीक्षणको पहिलो जम्प गो बन्जी ‘बन्जी जापान’का संस्थापक बीउ रिटालिकले गरेका छन्। रिटालिकसँगै बन्जीको सञ्चालनको लागि जापानबाट बन्जी जापानका जनरल म्यानेजर डेबिड पनि पोखरा आइपुगेका छन्।
बन्जीकै लागि बनाइएको ३५ मिटर अग्लो टावरमा नेपालमै पहिलो र एसियाकै अग्लो टावर क्लाइम्बिङ सुरु गरिएको भट्टराईले जानकारी दिए। बन्जी परिसरमै रेस्टुरेन्ट समेत निर्माण गरिएको छ ।
