युट्युबले अब भिडियोमा नराम्रा कमेन्ट लेख्न नमिल्ने फिचर ल्याउने तयारी गरिरहेको छ।
टेक क्रन्चका अनुसार बिहीबार युट्युबले समाजिक सञ्जालमा बढ्दै गएको घृणा र रिसको भाव कम गर्न नयाँ फिचर ल्याउने घोषणा गरेको हो।
सो फिचरले नराम्रा र घृणास्पद कमेन्ट लेख्ने व्यक्तिलाई त्यस्ता कमेन्ट पोष्ट गर्नुअघि एक पटक पुनर्विचार गर्न सिकाउने युट्युबले बताएको छ।
युट्युबका अनुसार यदि कोही व्यक्तिले भिडिओ नराम्रो कमेन्ट लेखिरहेको छ भने त्यहाँ ‘किप कमेन्ट रेसपेक्टफुल’ भन्ने चेतावनी आउँछ।
यसैको तलपट्टि ‘इडिट’ बटन विकल्प दिइएको छ, जहाँ आफ्ना नराम्रा कमेन्ट फेरि एकपटक हेरेर त्यसलाई मिलाएर सही ढंगले लेख्न सक्छन्। सँगै आफूले लेखेको कमेन्ट राम्रो हो वा होइन भन्ने बुझ्न त्यहाँ ‘कम्युनिटी गाइडलाइन’ नामक अर्को विकल्प पनि देखाइएको हुन्छ।
यी फिचरले कसैलाई नराम्रो कमेन्ट पोष्ट गर्नबाट रोक्दैन। यदि कमेन्ट पोष्ट गर्नु नै छ भने ‘पोष्ट एनिवे’ बटन क्लिक गर्न सक्छन्।
यो सँगै कम्पनीले चाँडै नै एउटा नयाँ फिल्टर फिचर पनि सुरू गर्नेछ, जसमा युट्युबरले उनीहरूका च्यानलमा आउने नराम्रा कमेन्ट देख्न सक्दैनन् र ती कमेन्ट सिधै कम्पनीले जाँच गर्ने टेक क्रन्चको भनाइ छ।
लामो समयदेखि युट्युबरहरूले आफ्ना च्यानलमा आउने आपत्तिजनक कमेन्टको बारे गुनासो गरिरहेका थिए। यही समस्यालाई मध्यनजर गर्दै युट्युबले यी नयाँ फिचर ल्याउने तयारी गरिरहेको हो।
युट्युबले टेक क्रन्चलाई बताए अनुसार यसमा रहेको प्रणालीले प्रयोगकर्ताले बारम्बार आपत्तिजनक भनिएको कुरालाई नै नराम्रो कमेन्ट हो भनेर जान्नेछ। त्यही आधारमा त्यस्ता कमेन्ट गर्नेलाई चेतावनी दिइनेछ।
नराम्रा कमेन्ट पोष्ट गर्नबाट रोक्ने यस्तो फिचर व्यक्तिलाई आफ्नो सोच र कार्य बारे पुनर्विचार गरेर सचेत बनाउने उद्देश्यले सुरु गरिएको युटुबले बताएको छ।
सन् २०१९ को सुरुदेखि युट्युबले नराम्रा कमेन्टहरु हटाउने कार्य ४६ औं गुणाले बढाएको दाबी गरेको छ।
एक मिलियनभन्दा बढी च्यानलहरु युट्युबको नीति उल्लंघन गरेको कारण हटाइएको छ र ५४ हजारभन्दा बढी च्यानलले घृणास्पद कन्टेन्ट देखाएको कारण रद्द गरिएको टेक क्रन्चले बताएको छ।
कम्पनीका अनुसार यसले अनलाइनमा आउने नराम्रा कमेन्टले युट्युबरहरूलाई कसरी पीडा परिरहेको छ भनी बुझ्न सबै युट्युबरबीच एउटा सर्वेक्षण पनि चलाउने छ।
पछिल्लो समय यता इन्स्टाग्रामले पनि नराम्रा कमेन्ट हटाउने फिचर सुरू गरिसकेको छ।
ट्वीटरले भने प्रयोगकर्तालाई कुनै पोष्ट सेयर गर्नु अघि त्यहाँ भएका कुरा एकपटक पढेर मात्र रिट्वीट गर्न मिल्ने नयाँ फिचर ल्याएको छ।
