खोटाङको लामिडाँडा विमानस्थलमा २ वर्षपछि जहाज अवतरण गरेको छ। विमानस्थल स्तरोन्नतीका लागि भन्दै बन्द गरिएको उक्त विमानस्थलको कालोपत्रे गर्ने काम सकिएसँगै आज जहाज अवतरण गरेको हो।
समिट एयरले विमानस्थलमा आज परीक्षण उडान गरेको छ।
विमानस्थलमा नियमित उडान गर्नुपहिले गरिने यस्तो उडान गरेपछि स्थानीयहरु अबदेखि नियमित उडान हुने आशमा रहेका छन्। रावावेसी गाउँपालिका अध्यक्षा लिलानाथ निरौलाले विमानस्थलको पूर्वाधार बनेपनि अवदेखि नियमित उडानको अपेक्षामा आफूहरु रहेको बताए।
'राज्यले ठूलो लगानी गरेर यत्रो पूर्वाधार बनाएको छ,यहाँ नियमित उडान भएपछि हाम्रा नागरिकलाई आपतकालिन सेवा तथा सुविधा दिन पाइने आशमा हामी छौं' निरौलाले भने।
विस २०२९ सालमा निर्माण भएको उक्त विमानस्थलमा पहिले नेपाल एयरलाइन्सले नियमित उडान गरिरहेको थियो। पक्की भएर विमानस्थल खुलेपछि नियमित उडान कसले गर्ने भन्ने कुराको टुंगो भने लागेको छैन।
५१६ मिटर लामो धावनमार्ग भएको विमानस्थलमा ट्वीनटर,एल४१०,वाइ१२ जस्ता जहाजहरु उडान तथा अवतरण गर्न सक्छन्।
नियमित उडानको पहल गर्ने सांसद भट्टराईको प्रतिबद्धता
खोटाङबाट संघीय प्रतिनिधिसभाम प्रतिनिधित्व गर्ने सांसद विशाल भट्टराईले विमानस्थलमा कालोपत्रे हुनुमा धेरैको साथ र सहयोग रहेको बताए।
उनले अब विमानस्थलमा नियमित उडानका लागि आफूले सरकार,नागरिक उड्डयन प्राधिकरण र वायुसेवा सञ्चालकहरुसँग पहल गर्ने जानकारी दिए।
"धेरै मेहनत पछि विमानस्थल पक्की भएको छ लामो समयसम्म कच्ची धावनमार्गबाटै काम चलेको यो विमानस्थल अब झनै भरपर्दो भएको छ यसमा धेरैजनाको योगदान रहेको छ" उनले भने"अब यो विमानस्थलमा कसरी नियमित उडान गर्ने भन्नेमै मेरो ध्यान हुने छ।"
विमानस्थलमा नियमित उडानका लागि व्यावसायिक सम्भाव्यता प्रसस्त रहेकाले एयरलाइन्सहरुले सहजै नियमित उडान गर्ने उनको विश्वास छ।
हलेसी मन्दिर दर्शन गर्नलाई आउने पर्यटकहरु धेरै रहेको र ती मध्ये धेरै जहाजबाटै आउन चाहने उनको भनाइ छ। हलेसी लगायत अन्य धार्मिक पर्यटकीय स्थल नजिकै भएकाले लामिडाँडा विमानस्थलमा नियमित उडान सम्भव हुने उनको विश्वास छ।