पेट्रोलियम पदार्थ अन्वेषणका लागि नेपाल आएको चिनियाँ टोली भोलि दैलेख जाँदै जाने भएको छ। चीनको टोली जुन २१ मा नेपाल आएको थियो
२०१८ फेब्रुअरी २८ मा नेपाल र चीन सरकार बिच नेपालमा पेट्रोलियम पदार्थको अन्वेषण गर्ने सम्झौता भएको थियो। सोही सम्झौता अनुरूप पेट्रोलियम अन्वेषण हुने भएको हो।
अन्वेषणका लागि भोलि एक टोली दैलेख जाने भएको खानी तथा भुगर्भ विभागका पेट्रोलियम परियोजना प्रमुख सुधिर रजौरेले जानकारी दिए।
उनका अनुसार अर्को २ वटा टोली भने आइतबार देखि जाने छन्।
दैलेख र पाल्पा क्षेत्रमा पेट्रोलियमा पदार्थको अन्वेषण गर्ने योजना रहेको छ। पहिलो चरणमा म्याग्नेटुटेलुडिक सर्भे गरिन्छ। यो सर्भेमा जमिनको ५ देखि २० किमि सतह मुनीको बनावटको अध्ययन गरिन्छ। यसबाट पेट्रोलियम पदार्थ जम्मा भएर बस्ने संरचना पत्ता लगाउन सकिने छ।
दोस्रो चरणमा (स्यास्ट्रिक सर्भे) जमिन मुनी कम्पनको तरङ्ग पठाएर डिलिङ गरिन्छ। यस सर्भेबाट जमिन मुनी पेट्रोलियम पदार्थको भण्डारण कहाँ छ भन्ने पत्ता लगाउन सकिन्छ। उक्त पेट्रोलियम पदार्थ कति मात्रामा छ, आर्थिक रूपमा उत्खनन योग्य हुन्छ की हुँदैन भनेर हेरिन्छ।
रजौरेका अनुसार विभागले गरेको अन्वेषणले दैलेखमा पेट्रोलियम पदार्थ रहेको प्रमाणित भैसकेको छ। पेट्रोलियम पदार्थको परिमाण र व्यवसायिकताका बारेमा अध्ययन गर्नु चिनियाँ टोली खटाइएको हो।
त्यहाँ आर्थिक रूपमा उत्खनन योग्य पेट्रोलियम पदार्थ भेटियो भने पेट्रोलियम पदार्थको आयात घट्नुका साथै नेपालको अन्य क्षेत्रमा पनि पेट्रोलियम पदार्थ हुने सम्भावना बढ्ने उनको भनाइ छ।
अहिले नेपाल र चीन सरकार बिच अन्वेषणको मात्र सम्झौता भएको हो। अन्वेषणका क्रममा पेट्रोलियम पदार्थ भेटिए उत्खनन् कसले गर्छ भन्ने विषयमा छलफल नभएको विभागले जानकारी दिएको छ।
