चीनको अगुवाइमा स्थापना भएको बहुपक्षीय विकास बैंक एसियाली पूर्वाधार विकास बैंकले नेपाललाई सहुलियत ऋण दिनुपर्ने लविइङलाई निरन्तरता दिएको छ। जुलाई १२ र १३ मा सम्पन्न बैंकको वार्षिक बैठकमा नेपालको पक्षबाट सहुलियत ऋणलाई मुख्य एजेन्डाका रुपमा प्रस्तुत गरिएको छ।
नेपालले विगतदेखि नै सहुलियत ऋणको पक्षमा बैंकको बोर्डमा प्रस्ताव राख्दै आएको छ।
लक्जेमवर्गमा सम्पन्न बोर्ड अफ गभर्नर्सको बैठकमा नेपालका तर्फबाट उक्त कुरा उठाइएको सहसचिव धनिराम शर्माले जानकारी दिए।
'बैंकको यो नियमित बैठक हो। हामीले सहुलियतपूर्ण ऋण पाउनुपर्छ भनेर उठाएका छौं। यो कुरा बोर्ड अफ गभर्नर्समा उठेको छ र वर्किङ तहमा पनि राम्रैसँग छलफल भएको छ। हाम्रो कुरा सुनुवाइ हुनेमा हामी आशावादी छौं' उनले भने।
पूर्वाधार विकासमा लगानी गर्ने भन्दै चीनको अगुवाइमा स्थापना भएको बैंकले दिने ऋणको ब्याजदर अहिले औषत पाँच प्ततिशत रहेको छ। जुन नेपालजस्ता न्यून आय भएका मुलुकहरुका लागि कठिन हुने भन्दै आवाज उठ्दै आएको छ। बैंकले हालसम्म आयका आधारमा ब्याजदर दिने व्यवस्था गरेको छैन।
बैंकको नीतिगत सुधारका लागि नेपालले निरन्तर आवाज उठाउँदै आएको छ।
यो पालिको बैठकमा पनि नेपाललाई दीगो विकास लक्ष्य भेट्टाउन लगानी अभाव भएको र सोही अभाव पूरा गर्न सहुलियत ऋणको व्यवस्था हुनुपर्ने नेपालले प्रस्ताव गरेको छ।
सन् २०१६ मा स्थापना भएको यो बैंकमा हालसम्म एक सय सदस्य राष्ट्र पुगेका छन्। बैंकले नेपालमा माथिल्लो त्रिशुली १ मा १० अर्ब लगानी गरेको छ।बैंकले २१६ मेगावाट क्षमताको उक्त आयोजनाका लागि ९ करोड अमेरिकी डलर ऋण गएको महिना स्वीकृत गरेको थियो।
नेपालले अन्य पूर्वाधारमा लगानी गर्न प्रस्ताव गरेपनि बैंकले हालसम्म कुनै निर्णय दिएको छैन।
