संस्कृति, पर्यटन तथा नागरिक उड्डयन मन्त्री योगेश भट्टराईले नेपाल वायुसेवा निगमले आफूसँग भएका जहाज पूर्ण उपयोग गरी आम्दानी र सेवा विस्तार गर्न निर्दशन दिएका छन्। नेपाल एयरलाइन्सका उच्चपदस्थ अधिकारीहरुसँगको बैठकमा भट्टराईले अधिकतम उडान गर्न सुझाव दिएका हुन्।
नेपाल एयरलाइन्सले आवस्यकताअनुसार जहाज थप गर्दै जानुपर्ने तर खरिद प्रक्रिया पारदर्शी हुनुपर्ने पहिलो शर्त हुने उनले बताए। जहाज किन्दा प्रश्न उठ्न नहुने उनको भनाइ थियो।
मन्त्री भट्टराईले विगतमा दुर्गम क्षेत्रमा गरेको सेवा उल्लेखनीय रहेको बताउँदै अवका दिनमा त्यहीअनुसार सेवा दिनुपर्ने बताए।
विमानस्थलहरुको संख्या थपिंदै गएको सन्दर्भमा सबैतिर उडान गर्न सल्लाह दिंदै उनले आगामी मंसीरमा निजगढ विमानस्थलको शिलान्यास गरिने जानकारी गराएका थिए।
उक्त अवसरमा संस्कृति, पर्यटन तथा नागरिक उड्डयन मन्त्रालयका निमित्त सचिव सुरेश आचार्यले निगमको ऋण र पूँजीमा संतुलन आवश्यक भएको र त्यसमा सरकारको सकारात्मक सहयोग रहने तर स्पष्ट व्यावसायिक योजना प्रस्तुत गर्न निगम नेतृत्वलाई आग्रह गरे।
निगमका कार्यकारी अध्यक्ष मदन खरेलले भने सरकारले २० अर्ब रुपैयाँ दिनुपर्ने अडानलाई दोहोर्याएका थिए।