प्रदेश र स्थानीय सरकारले केन्द्रले सहयोग नगरेको आरोप लगाएका छन्। संघीय उद्योग वाणिज्य तथा आपूर्ति मन्त्रालयले शुक्रबार आयोजना गरेको चाडपर्व लक्षित आपुर्ति व्यवस्था र बजार अनुगमन विषयक अन्तक्र्रिया तथा छलफल कार्यक्रममा उनीहरुले समुन्वयको अभाव भएको बताएका हुन्।
‘केन्द्रले अहिलेसम्म काम कारबाही बारे प्रदेश र स्थानीय सँग केही समन्वय गरेको थिएन, यो पहिलो पटक हो’, गण्डकी प्रदेश मन्त्री विकास लम्साले भने।
आगामी दिनमा स्थानीय र प्रदेशसँग समन्वय गरेर अगाडी बढ्न उनले आग्रह गरे। गाउँगाउँमा राम्रो उत्पादन भएपनि बजारमा आउन नसकेका उनले बताए।
केन्द्रले सञ्चालन गर्ने सुपथ मूल्य पसलमा गाउँगाउँका सामान ल्याउनुपर्ने उनको भनाइ। त्यस्तै चाडपर्व लक्षित प्रत्येक स्थानीय तहमा सुपथ मूल्य पसल सञ्चालन गर्न उनले आग्रह गरे।
‘जनतालाई गुणस्तर र सस्तो सामान खुवाउने हो भने हामीले केन्द्रमा मात्र नभएर एक स्थानीय तहमा एक सुपथमूल्य सञ्चालन गर्नुपर्छ’, उनले भने,, ‘त्यसमा हामीले के सहयोग गर्नुपर्छ तत्पर छौँ।’
चाडपर्वमा व्यापारीले विभिन्न प्रकारका अखाद्य रङ मिसाएर सामान ल्याएर उपभोक्ता ठग्ने प्रवृत्ति भएको स्थानीय तथा प्रदेश सरकारका प्रतिनिधिहरुले बताएका थिए। त्यस्ता सामानको अनुगमन आखाँले हेरेर मात्र नगरी प्रयोगशालामा लगेर जाच्ने व्यवस्था हुनुपर्ने उनइहरुको भनाइ छ।
प्रदेश सरकारले आफै विषादी जाँच गर्ने
प्रदेश सरकारले पनि आ–आफ्नै प्रदेशमा खाद्य बस्तुको विषादी परीक्षणका लागि प्रयोगशाला स्थापना गर्ने योजना तय गरेका छन ।
खाद्य बस्तुको विषादी परीक्षण गर्न संघीय सरकारले नसकिरहेका बेला प्रदेश सरकार आफैले १/१ वटा खाद्य बस्तुको विषादी परीक्षणका लागि प्रयोगशाला स्थापना गर्ने योजना तय गरिएको सार्वजनिक गरेका हुन ।
प्रदेश ५ का उद्योग, पर्यटन, वन तथा वातारणमन्त्री लिला गिरी, प्रदेश ३ का उद्योग, पर्यटन वन तथा वातावरणमन्त्री अरुण नेपाल, गण्डकी प्रदेशका उद्योग, पर्यटन, वन तथा वातारणमन्त्री विकास लम्सालले खाद्य बस्तुको विषादी परीक्षणका लागि प्रयोगशालाको स्थापना गर्ने प्रतिवद्धता व्यक्त गरेका थिए। त्यसका लागि आवश्यक योजना पनि तय गरिएको प्रदेशका मन्त्रीहरुको भनाई छ । प्रदेश ५ का उद्योग, पर्यटन, वन तथा वातावरणमन्त्री गिरीले जनस्वास्थ्यमाथि खेलबाड हुन नदिन प्रदेश ५ ले भैरहवामा खाद्य बस्तुको विषादी परीक्षणका लागि एउटा प्रयोगशाला स्थापना गर्न लागिएको जानकारी दिए।
प्रदेश ३ का उद्योग, पर्यटन, वन तथा वातावरणमन्त्री नेपालले पनि हेटौडामा दुध, तरकारी र पानीको परीक्षण हुने गरी प्रयोगशाला निर्माण गर्ने जानकारी दिए। उनले चाँडबाँडका बेला बजार अनुगमनको कामलाई अघि बढाउन प्रदेश सरकारलाई स्रोत, साधनले सम्पन्न बनाउन पनि संघीय सरकारसँग आग्रह गरे।
गण्डकी प्रदेशका उद्योग, पर्यटन, वन तथा वातावरणमन्त्री विकास लम्सालले खाद्य बस्तुको बजार अनुगमनका लागि बजार अनुगमन निर्देशिका बनाएर कामलाई अघि बढाइएको जानकारी दिए। उनले बजार अनुगमनको कामलाई प्रभावकारी बनाउन संघीय, प्रदेश र स्थानीय सरकारबीच बलियो सहकार्य हुनुपर्नेमा पनि जोड दिए।
कर्णाली प्रदेशका उद्योग, पर्यटन, वन तथा वातावरण मन्त्री नन्दसिंह बुडाले संघीय सरकारले बजार अनुगमनका लागि आवश्यक प्रभावकारी कदम चाल्नुपर्ने माग गरे। उनले कर्णाली खाद्यन्नको हिसाबले पछि परेको हुनाले त्यसमा विशेष व्यवस्था गर्न पनि संघीय सरकारको गम्भिर ध्यानाकर्षण गराए।
यता, संघीय सरकारका उद्योग, वाणिज्य तथा आपूर्तिमन्त्री मातृकाप्रसाद यादवले दशैं, तिहारजस्ता चाँड पर्वका बेला हुने मूल्यवृद्धिलाई ध्यानमा राखेर बजार अनुगमनको कामलाई तीव्रता दिन प्रदेश र स्थानीय सरकारलाई आग्रह गरे। उनले चाँडबाँडका बेला उपभोक्तालाई मारमा पार्ने काम हुन नदिन पनि तीनै तहको सरकारले बजार अनुगमनको कामलाई प्रभावकारी बनाउनुपर्ने आवश्यक्ता रहेको पनि स्पष्ट पारे।
कार्यक्रममा महानगरपालिका र उपमहानगरपालिकाका जनप्रतिनिधिहरुले पनि चाँडबाँडको बेला उपभोक्तालाई मारमा नपार्ने गरी बजार अनुगमनको कामलाई अघि बढाउन प्रदेश र संघीय सरकारसँग सहकार्य गरेर अघि बढने प्रतिवद्धता जनाएका थिए ।
