दातृ निकायको सहयोगमा बन्ने सबै आयोजनामा नेपाली निमार्ण व्यवसायी पनि सहभागि हुन मिल्ने गरी सर्त निर्धारण गर्न सार्वजनिक लेखा समितिले भौतिक पूर्वाधार तथा यातायात मन्त्रालयलाई निर्देशन दिएको छ ।
यो निर्देशन अनुसार जुनसुकै दातृ संस्थाको सहयोगमा आयोजना निमार्ण भइरहेको भएपनि त्यसमा नेपाली व्यवसायीलाई कुनै रोक नहुने गरि बोलपत्रको सर्त निर्धारण गर्नुपर्छ ।
नेपाल सरकार सडक विभाग, आयोजना निर्देशनालयद्धारा एशियाली विकास बैंकको ऋण सहयोगमा कन्चनपुर कमला सडक निमार्ण भइरहेको छ । साउथ एशिया सवरिजनल इकोनोमिक कोअपरेसन (एसएएसइसी) अन्तर्गत यो सडक निमार्णको लागि दुई टेन्डर आह्वान गरिएको थियो ।
उक्त टेन्डरमा नेपाली निमार्ण व्यवसायीहरुले प्रतिस्पर्धा गर्न नपाउने गरी शर्तहरु राखिएको गुनासो व्यवसायीको थियो । तर, सडक विभाग भने एडिबीकै गाइडलाइनको आधारमा टेन्डर खुलाएको बताएको छ ।
नेपाली निमार्ण व्यवसायीहरुको सहभागिताका सन्दर्भमा निमार्ण व्यवसायी महासंघ र अन्य निर्माण व्यवसायीहरु तथा भौतिक पुर्वाधार तथा यातायात मन्त्रालयका सचिवसँग पनि सार्वजनिक लेखा समितिले चरणबद्ध छलफल गरेको थियो ।
उक्त छलफल पछि अब सडक निमार्ण गर्न बोलपत्र आह्वानका सर्तहरु निर्धारण गर्दा नेपाली निमार्ण व्यवसायीहरुले समेत प्रतिस्पर्धा गर्ने अवसर सिर्जना गरी गर्नुपर्ने निर्देशन दिएको हो ।
तर सडक विभागले भने विदेशी सहयोगमा बन्ने सबै आयोजनाहरुमा दातृ निकायकै गाइडलाइनअनुसार बोलपत्रका सर्तहरु निर्धारण गरिने बताउछ ।
‘त्यो सडक एडिबीको सहयोगमा बन्न लागेको हो, त्यसको ठेक्का एडिबीको गाइडलाइनका आधारमानै हुन्छ,’ सडक विमागका प्रवक्ता शिवहरी सापकोटाले भने, ‘उनीहरुले ग्लोबल बोलपत्र खोल्ने हो त्यसमा देशी–विदेशी भन्ने कुरा हुदैन सबैले आवेदन दिन पाइन्छ ।’
नेपालमा बन्ने प्राय विदेशी सहयोगका आयोजनामा संस्था वा देशको सर्त अनुसारनै बोलपत्र आह्वान गरिने उनले बताए ।
