विद्युत प्रधिकरणले लोडसेडिङ अन्त्यको घोषणा गरेपनि बेला बेलामा प्रधिकरणको विद्युत काटिने समस्या गएको छैन।
कुनै बेला लामो समय लोडसेडिङको समस्या भोगेका सर्वसाधारण अहिले पनि विद्युत काटिनु लोडसेडिङकै रुपमा लिएका छन्।
तर विद्युत प्रधिकरणका कार्यकारी निर्देशक कुलमान घिसिङले भने सिस्टमा डिस्टर्ब हुदाँ विद्युत जाने गरेको बताउँछन्।
आइतबार विद्युत प्रधिकरणमा भएको पत्रकार सम्मेलनमा उनले बेला बेलामा विद्युत जानुलाई लोडसेडिङको रुपमा नलिन आग्रह समेत गरे।‘कुनै निश्चत समय तोकेर विद्युत काटिन्छ भने त्यो लोडसेडिङ हो,’ उनले भने, ‘अहिले वर्षाको समयमा अलि बढी यस्तो भएको छ।’
वर्षा मौसममा बाढी आउने, विद्युतको पोल ढल्ने, हावा चल्ने आदी कारणले नियमीत प्रसारणमा समस्या भएको उनले बताए।
‘यो गर्मीको समय भएकाले एकै पटक पंखा र एसी जस्ता विद्युतीय उपकरण चल्दा ट्रान्सफर्मरमा ओभर लोड हुँदा विद्युत काटिएको हो’, उनले भने, ‘यस्तो बेलामा भोल्टेज कम हुने समस्या पनि हुन्छ र विद्युत काट्न पर्छ।’
तर, असोज देखि फागुनसम्म यस्तो समस्या नहुने उनले दाबी गरे ।‘असोज पछि पानी कम पर्छ, बाढी आउदैन, हावा चल्दैन, मौसम सफा हुन्छ, त्यसैले यस्तो समस्या आउदैन,’ उनले भने।
तर, यो बेलामा विकास निमार्णका कामहरु धेरै हुने हुनाले पोल सार्नुपर्ने जस्ता समस्या भने हुने बताए।
एक ठाउँमा समस्या भएर विद्युत काट्दा त्यसको असर ठुलो भागमा पर्ने हुनाले सव स्टेसनको समस्याले पनि धेरैले विद्युतको काटिने समस्या भोग्नु परेको उनको भनाइ छ।