प्रदेश ३ का सभामुख सानुकुमार श्रेष्ठले सहकारीलाई उत्पादन र रोजगारीमा जोडेर आर्थिक समृद्धिको लक्ष्य हासिल गर्ने कार्ययोजना कार्यान्वयनमा प्रदेश सरकार गम्भीर रहेको बताएका छन्।
काठमाडौंमा शनिबार आयोजित एक कार्यक्रममा बोल्दै सभामुख श्रेष्ठले ३ नम्वर प्रदेशमा सहकारी ऐन पारित भइसकेको कारण कार्ययोजना कार्यान्वयनमा प्रदेश सरकार गम्भीर रहेको बताएका हुन्।
सभामुख श्रेष्ठले सहकारीको माध्यमबाट आयतलाई विस्थापन गर्दै कृषि,पर्यटन र उद्योगमा लगानी वृद्धि गर्न सकिए आर्थिक सबलीकरणमा जाने बताए।
उनले भने,‘देशको आर्थिक समृद्धि हासिल गर्न प्रदेश सरकारसँगै मिलेर सहकारीले लगानी गर्न सक्छ,सरकार र निजी क्षेत्रको सहकार्य गरेर अगाडि बढ्न तयार छ।’
सरकारको तीन खम्वे अर्थ नीतिलाई सहयोग गर्न र संघसँग बाझिएको कानुन संशोधन गरेर आर्थिक विकासका लक्ष्यसँगै जोडेर अगाडि बढ्ने उनको भनाइ छ।
यस्तै सांसद बेलीमाया घलेले सहकारीको एकीकृत पुँजीलाई उद्योग धन्दा र पर्यटन विकासमा लगानी गर्न सकिए आर्थिक समृद्धि हासिल गर्न सकिनेमा जोड दिइन्।
उनले भनिन्,‘चन्द्रागिरी नगरपालिकामा १४० को हाराहारीमा सहकारी रहेकाले कुन कुन संस्थाले सदस्यको हितमा काम गरिरहेका छन् त्यसको लेखाजोखा गर्नुपर्ने बेला आएको छ त्यसका लागि प्रदेश सरकार गम्भीर छ।’
चन्द्रागिरि नगरपालिका नगर प्रमुख घनश्याम गिरीले सहकारीको पुँजीलाई उत्पादनसँग जोड्नुपर्ने बताए।