पश्चिम नवलपरासीको रामग्राम नगरपालिका–१० स्थित वरुण वेभरिज प्रालि (पेप्सी कम्पनी) का श्रमिकहरू चरणवद्ध आन्दोलनमा उत्रिएका छन्।
विभिन्न नौ बुँदे मागसहित विगत पाँच महिनादेखि शान्तिपूर्ण संघर्ष गर्दै आएका यहाँका कामदारले माग सुनुवाइ नभएको भन्दै चरणवद्ध आन्दोलन थालेका हुन्।
उक्त कम्पनीमा कर्मचारी र कामदार गरी ५२० कार्यरत रहेका छन्। आन्दोलनमा उत्रने नेपाली श्रमिकलाई निष्कासन गर्दै कम्पनीले अहिले भारतबाट कामदार ल्याएर काममा लगाएको छ।
पटक-पटक कम्पनीको व्यवस्थापन पक्षले माग सम्बोधनका लागि निर्णय गर्ने तर कार्यान्वयन नगर्ने गरेको भन्दै श्रमिकहरूले अन्तिम पटकका लागि भन्दै यही असोज १४ गतेसम्म विगतमा भएका निर्णय कार्यान्वयन गर्न अन्तिम पटकको अल्टिमेटम दिएका छन्। चरणवद्ध आन्दोलन सुरू गरेका श्रमिकलाई राजनीतिक दल, नागरिक समाजले समर्थन गरेका छन्।
श्रम ऐन कार्यान्वयन र निष्कासन गरिएका श्रमिकको पुनःबहाली लगायतको माग राखेर आफूहरूले चरणवद्ध आन्दोलनमा जान बाध्य भएको आन्दोलनरत सामूहिक सौदाबाजी समितिका संयोजक रमेश गौतमले बताए।
‘पटक-पटक यस विषयमा कम्पनीको व्यवस्थापन पक्षसँग सहमति भए पनि कार्यान्वयनमा चासो देखाइएको छैन, दुई वर्षदेखि यहाँ कार्यरत सबै श्रमिकलाई कम्पनीले सप्लायर कम्पनीमार्फत् दैनिक ज्यालादारीका रूपमा राखेर काम गराउँदै आएको छ’ उनले भने।
नियुक्तिपत्र बिनै काममा राखिएको भन्दै श्रमिकले रोजगार सम्झौता गरी नियमित रोजगारको नियुक्तपत्र दिएर मात्र काममा राख्न माग गर्दै आएका छन्।
‘विगत पाँच महिनादेखि नै यहाँ कार्यरत हामी श्रमिक आन्दोलित हुँदै आएका छौं,कम्पनीले माग सुनुवाइमा चासो दिएको छैन, आन्दोलन गरेको भन्दै कम्पनीले उल्टै ५० श्रमिकलाई निष्कासन पनि गरेको छ’ श्रम ऐनबमोजिम कम्पनीमा गठित सौदाबाजी समितिका संयोजक गौतमले भने।
श्रमिक राख्दा स्थानीयवासीलाई ग्राहयता पनि नदिइएको उनको गुनासो छ।
निष्कासन गरिएका श्रमिकलाई तत्काल पुनःबहाली गर्नुपर्ने, श्रम ऐनले तोकेबमोजिमको पारिश्रमिक उपलब्ध गराउनुपर्ने, कम्पनीले सिधै नियुक्ति दिनुपर्ने, बिनाकारण कामबाट निष्कासन गर्न नपाइने, ठेकेदारीप्रथा अन्त्य गर्नुपर्नेलगायतका माग राखेका छन्।
श्रमिकको श्रम शोषण गर्ने, अमानवीय व्यवहार गर्ने तथा कुनै पनि बेला निष्कासन गर्ने कार्यले श्रमिक प्रताडित भएको उनको भनाइ छ।
कम्पनीको व्यवस्थापन पक्षले श्रमिकका माग सम्बोधनमा आलटाल गर्दै आएपछि विभिन्न समयमा राजनीतिक दल, सांसद, जिल्ला प्रशासन कार्यालय, उद्योग वाणिज्य संघको पहलमा पटक-पटक माग सम्बोधनका लागि श्रमिक र कम्पनीबीच सहमति भएको थियो।
कम्पनीले सहमति कार्यान्वयनमा चासो नदेखाएको भन्दै राजनीतिक दलहरूले श्रमिकको आन्दोलनमा ऐक्बद्धता जनाउँदै चरणवद्ध आन्दोलनप्रति समर्थन जनाएको सत्तारूढ नेपाल कम्युनिष्ट पार्टी (नेकपा)का बुद्धन अलीले बताए।
नेपाली कांग्रेसका जिल्ला सचिव विक्रम यादवले श्रमिकको समस्या समाधानका लागि श्रमिकले गर्ने चरणवद्ध आन्दोलनमा साथ दिँदै यही असोज १४ गते परासीमा विरोध प्रदर्शनसहित जिल्ला प्रशासन कार्यालयमा ज्ञापनपत्र बुझाउने र सुनुवाइ नभए असोज १७ गते कम्पनीमै अनिश्चितकालका लागि तालाबन्दी गर्ने निर्णय भएको जानकारी दिए।
राजपाका जिल्ला संयोजक मुकुरजी गिरीले सर्वपक्षीयरूपमा पटक–पटक सहमति हुँदा पनि उद्योग प्रशासनले निर्णय कार्यान्वयनमा आलटाल गर्नु विडम्बना भएको बताए।
समाजवादी पार्टीका जिल्ला उपाध्यक्ष अमिरुल्लाह मियाँले श्रमिकले गर्ने चरणवद्ध आन्दोलनमा सबै राजनीतिक दलले साथ दिने निर्णय भएको जानकारी दिए। (रासस)
