त्रिभुवन अन्तर्राष्ट्रिय विमानस्थलको क्षमता विस्तार आयोजना अन्तर्गतको एउटा ठेक्काको काम रोकिएको छ। चिनियाँ कम्पनीहरुले लिखित उजुरी दिएपछि रोकिएको हो।
प्राविधिक प्रस्ताव मूल्यांकन सम्पन्न भइसकेको भएपनि चिनियाँ कम्पनीहरुले उजुरी दिएपछि आर्थिक प्रस्ताव खोल्ने काम रोकिएको हो। दसैं अघि नै आर्थिक प्रस्ताव खोल्ने भन्दै प्राधिकरणले सूचना जारी गरेपछि चिनियाँ राष्ट्रपतिको भ्रमणपछिमात्र प्रक्रिया अघि बढाइने भएको हो।
विमानस्थलको एप्रोन र ट्याक्सी वे विस्तारका लागि ८ अर्ब अनुमानित लागतमा आव्हान गरिएको उक्त ठेक्कामा सहभागी चिनियाँ कम्पनीहरुले उजुरी गरेका छन्।
प्राविधिक प्रस्ताव खोलिएपनि आर्थिक प्रस्ताव खोल्ने काम अहिलेलाई स्थगित भएको नेपाल नागरिक उड्डयन प्राधिकरणका सूचना अधिकारी त्रिलोचन पौडेलले जानकारी दिए।
भैरहवामा विमानस्थल विस्तारको काम गरिरहेको कम्पनीले आफूलाई प्राविधिक प्रस्तावमा फेल गराइनु अस्वभाविक भएको बताउँदै निवेदन दिएको छ। प्राविधिक प्रस्ताव छनौट नभएका अन्य कम्पनीहरुले पनि पुनरावलोकनको माग गर्दै निवेदन दिएका छन्।
गत वर्षको अप्रिलमा प्राधिकरणले टेन्डर आव्हान गरेको थियो। त्यसमा ७ कम्पनीले भाग लिएका थिए। प्राधिकरणको मूल्यांकन समितिले यसमा २ कम्पनीलाईमात्र छनौट गरेको थियो। छनौट हुने पनि चिनियाँ कम्पनी नै रहेका छन्।
यसमा भैरहवा विमानस्थल निर्माण गरिरहेको नर्थवेस्ट सिभिल एभिएसन एअरपोर्ट कन्स्ट्रक्सन, युनान कन्स्ट्रक्सन एन्ड इन्भेस्टमेन्ट होल्डिङ,चाइना नेसनल एरोटेक्नोलोजी इन्टरनेसनल इन्जिनियरिङ कर्पोरेसन,चाइना स्टेट कन्स्ट्रक्सन इन्जिनियरिङ कर्प, सीएएमसीई-सीआरबीईजी जेभी,चाइना जेङसु इन्टरनेसनल इकोनोमिक एन्ड टेक्निकल कोअपरेसन र कोभेक-सीआईजीसी-टुन्डी जेभी सहभागी भएका थिए।