बिजुली बसको खरिद प्रक्रिया रोक्न सझालाई सरकारले पत्र काटेको छ।
भौतिक पूर्वाधार तथा यातायात मन्त्रालयले असोज १ गते खरिद प्रक्रिया रोक्न पत्र पठाएको साझा यातायातका कार्यकारी निर्देशक भूषण तुलाधरले जानकारी दिए।
‘उहाँहरुले ढिलो भयो भनेर प्रक्रिया रोक्न भन्नु भएको छ। थप छलफलको लागि पनि बोलाउनु भएको छ। ढिलो हुँदा त काम छिटो गर्नु पो भन्ने त, काम रोक्न भन्ने हो र?’ उनले सेतोपाटीसँग भने।
साझाले कुनै ढिलासुस्ती नगरी बिजुलीबस खरिदका लागि तयारी गरेको तुलाधरले दावी गरे।
‘यातायात व्यवस्था विभाग, मन्त्रालय, सडक विभाग विद्युत प्राधिकरण लगायत सबै निकायको प्रतिनिधि राखेर कमिटी बनाउँदा १ महिना लाग्यो र त्यसको १ महिनामा हामीले खरिद प्रकृयाको ड्राफ्ट पनि तयार पारिसकेका छौं’ तुलाधरले भने।
साझाले छलफलको लागि २ पटक मन्त्रालयलाई चिठी पठाइसकेको उनले जानकारी दिए।
उनले भने ‘हामीले २ पटक चिठी पठाइसकेका छौं। त्यो चिठी मन्त्रीज्युकै टेबलमा छ भन्ने सुन्नमा आएको छ।’
यसअघि असोजको पहिलो साता मन्त्रालयले बिजुली बस खरिद प्रक्रिया कहाँ पुग्यो भनी साझासँग प्रगति विवरण माग गरेको थियो।
साझाले यसबारे जानकारी पठाएपछि मन्त्रालयले खरिद प्रक्रिया नै रोक्न भनेको हो।
आर्थिक वर्ष सकिनै लाग्दा गत असार २९ गते साझाको ३ अर्बको सेयर खरिद गरेर बिजुली बस संचालन गर्ने मन्त्रिपरिषदले निर्णय गरेको थियो। साे अनुरूप साझालाई साउन २ गते सरकारले ३ अर्ब रुपैयाँ दिएको थियो।
