वातावरण विभागले वातावरण प्रदुषण गर्ने २६ उद्योगलाई कारबारही गरेको छ।
वातावरण संरक्षण ऐन (पहिलो संशोधन) २०५३ बमोजिम २६ उद्योगलाई कारवाही गरेको हो।
वातावरण ऐन अनुसार मापदण्ड विपरीत कार्य गर्ने उद्योगलाई मन्त्रिपरिषद्को निर्णयअनुसार जरिवाना गरिएको विभागले जानकारी दिएको छ।
ती उद्योगहरूले फोहोर पानी प्रशोधन नगरी त्यत्तिकै फ्याँकेको, सङक्रमण फैलाउने फोहोरलाई व्यवस्थित नगरी सिधैँ फ्याँकेको वा जलाएको पाइएकोले कारबाही गरेको विभागका सूचना अधिकारी शङ्कर प्रसाद पौडेलले बताए।
ती उद्याेगकाे कारबाहीबाट सरकारले २१ लाख २५ हजार रूपैयाँ असुलेको छ।
विभागले उपलब्ध गराएको तथ्याङ्कअनुसार शुक्रराज ट्रपिकल तथा सरुवा रोग अस्पताल (टेकु), नेपाल आँखा अस्पताल (त्रिपुरेश्वर), परोपकार प्रसूति तथा स्त्रीरोग अस्पताललाई ४० हजार रुपैयाँ जरिवाना गरिएको छ।
त्यस्तै, रिलायन्स स्पिनिङ मिल्स लि (सुनसरी), यति डिस्टिलरी (चितवन), क्वालिटी थाई फुड्स (मोरङ), चण्डिका डिष्टिलरी (मोरङ), नोबल हस्पिटल (काठमाडौंँ), प्रिमियर वायर्स (मोरङ),नर्भिक इन्टरनेशनल हस्पिटल (माईतिघर), काठमाडौँ मेडिकल कलेज पब्लिक लि, गणेशमान सिंह मेमोरियल हस्पिटल एण्ड रिसर्च सेन्टर (ललितपुर), किष्ट मेडिकल कलेज तथा शिक्षण अस्पताल (ललितपुर), के पी सिमेन्ट ईण्डष्ट्रिज (धादिङ) र बाबा भेजिटेबल आयल ईण्डष्ट्रिज (मोरङ) लाई ९० हजार रूपैयाँ कारबाही गरिएको छ।
त्यसैगरी, घोराही सिमेन्ट ईण्डष्ट्रिज (दाङ), काठमाडौँ भ्याली अस्पताल (सुन्धारा), अल्का अस्पताल (जावालाखेल), ओम प्लाईउड ईण्डष्ट्रिज (बाँके), चितवन मेडिकल कलेज शिक्षण अस्पताल (चितवन), प्रगति टेक्सटाईल ईण्डष्ट्रिज (सुनसरी), क्वालिटी ग्रिट एण्ड क्रसर उद्योग (तनहुँ), खनाल ग्रिट बालुवा, एभरेष्ट हस्पिटल (नयाँ बानेश्वर) र एसियन थाई फुड्स (सुनसरी) ९० हजार जरिवानमा परेका छन्।
यस्तै आयुर्वेदिक चिकित्सालय नरदेवी (काठमाडौँ) भने २५ हजार जरिवानमा परेको विभागले उपलब्ध गराएको तथ्याङ्कमा उल्लेख छ।
