पछिल्लो समय भारतीय मुद्राको अवमूल्यन भइरहेको बेला त्यसलाई भगवानको फोटोले समाधान गर्न सक्ने भारतीय जनता पार्टी (बिजेपी)का नेताले बताएका छन्।
बिजेपीका नेता तथा राज्य सभा संसद सुब्रमण्यम स्वामीले मंगलबार मध्य-प्रदेशको एक कार्यक्रममा पत्रकारहरूसँग बोल्दै सो कुरा बताएका हुन्।
स्वामीले लक्ष्मीको फोटो भारतीय नोटमा राख्दा त्यसले भारतीय मुद्राको अवस्थामा सुधार आउने दाबी गरे।
केही वर्षदेखि भारतीय अर्थतन्त्रमा मन्दी लागेको अर्थशास्त्रीहरूले बताउँदै आइरहेका छन्।
भारतमा अहिले बेरोजगारीको दर बढेको छ र आइटीमा पनि संकुचन आएको छ।
केही दिनअघि भारत सरकारले रिपोर्ट निकाल्दै पछिल्लो ५ वर्षकै उच्च मुद्रा स्फ्रिति रहेको जनाएको थियो।
उत्पादन तथा रोजगारीमा भएको कमीले मुद्रा पनि कमजोर भएको भारतीय संचार माध्यमले जनाएका छन्।
इन्डोनेसियाको मुद्रामा पनि गणेशको फोटो राखिएकोबारे पत्रकारले सोधेको प्रश्नमा उनले भने, ‘प्रधानमन्त्री नरेन्द्र मोदिले त्यसको बारेमा आधिकारीक उत्तर दिनसक्नेछन्। म यसको पक्षमा छु। गणेश भगवानले समस्या समाधानमा सहयोग गरेको जस्तै लक्ष्मीको फोटोले मुद्राको अवस्थालाई सुधार्छ। लक्ष्मीको फोटो मुद्रामा राख्दा कसैले पनि नराम्रो सोच्दैनन्।’
