नेपालमा पर्यटकको आगमन बढ्दै गएको देखिएको छ। राष्ट्र बैंकले प्रकाशन गरेको ‘आर्थिक गतिविधि अध्ययन’ प्रतिवेदनले पर्यटकको संख्या बढेको देखाएको हो।
५७ वटा जिल्लामा अध्ययन गरेको प्रतिवेदनअनुसार २०७३/०७४, ०७४/०७५ र ०७५/०७६ गरी तीन आर्थिक वर्षमा पर्यटक आउनेको संख्यामा वृद्धि भएको देखिएको छ।
आव ०७३/०७४ मा ८ लाख ८८ हजार ५७ सय पर्यटक आएकोमा १२.६ प्रतिशतले वृद्धि भई ०७४/७५ मा करिब १० लाख पर्यटक भित्रिएको प्रतिवेदनले देखाएको छ।
०७५ साउनदेखि ०७६ असारसम्ममा १२ लाख ४० हजार ५ सय २७ जना पर्यटक भित्रिएका छन्। यो ०७४/७५ काे साेही अवधिको तुलनामा २४.१ प्रतिशतले बढी हो।
समीक्षा वर्षमा अध्ययनमा समेटिएका जिल्लामा पर्यटकस्तरीय होटल तथा लजको संख्यामा पनि १५.५ प्रतिशत र शैया संख्या २०.६ प्रतिशतले बढेको छ।
०७४/७५ मा पर्यटकस्तरीय होटल तथा लज २ हजार ८ सय ६० वटा र होटल शैया ७५ हजार ७ सय ९२ वटा थियो भने समीक्षा वर्षमा पर्यटकस्तरीय होटल तथा लज ३ हजार ३ सय ४ वटा र होटल शैया ९१ हजार ३ सय ७६ रहेको छ।
त्यस्तै आर्थिक वर्ष २०७३/०७४ मा अध्ययन क्षेत्रका पर्यटकस्तरीय होटल तथा लज २ हजार ५ सय ८० र होटल शैया ६९ हजार ८ सय ९९ थियो।
सन् २०१८ मा पर्यटक आगमन संख्या ११ लाख ७३ हजार ७२ थियो, यो संख्या सन् २०१७ भन्दा २४.८ प्रतिशतले बढी हो।
विवरण | आव २०७३/०७४ | आव २०७४/०७५ | आव २०७५/०७६ | गत अवधिको फरक प्रतिशत | समीक्षा अवधिको फरक प्रतिशत |
पर्यटक स्तरीय होटल तथा लजको संख्या | २५८० | २८६० | ३३०४ | १०.९ | १५.५ |
होटल शैयाको संख्या | ६९८९९ | ७५७९२ | ९१३७६ | ८.४ | २०.६ |
पर्यटक आगमन संख्या | ८८८०५७ | ९९९९२८ | १२४०५२७ | १२.६ | २४.१ |
स्रोतः अध्ययन क्षेत्रका होटल व्यवसायी संघ, पर्यटन उद्योग महाशाखा