यती समूहका संस्थापक प्रवन्ध निर्देशक स्वर्गीय आङ छिरिङ शेर्पाको सम्झनामा यती समूहका कर्मचारीहरुले रक्तदान गरेका छन्।
शेर्पाको पहिलो वार्षिक पुण्यतिथिमा यती एअरलाइन्सले केन्द्रिय कार्यालयमा रक्तदान कार्यक्रम आयोजना गरेको थियो।
वरिष्ठ पर्यटन व्यवसायी शेर्पाको गत वर्ष ताप्लेजुङ हेलिकप्टर दुर्घटनामा निधन भएको थियो। दुर्घटनामा आङछिरिङ शेर्पासँगै संस्कृति, पर्यटन तथा नागरिक उड्डयनमन्त्री रविन्द्र अधिकारी लगायत ७ जनाको निधन भएको थियो।
शेर्पाको सम्झनामा रक्तदान गर्नुपूर्व १ मिनेट मौनधारण गरिएको थियो। त्यसपछि खादा र पुष्पगुच्छा चढाई सबैले श्रद्धाञ्जली अर्पण गरेका थिए।
यती एअरलाइन्सका कार्यकारी अध्यक्ष लाक्पा सोनाम शेर्पा, प्रमुख कार्यकारी अधिकृत उमेशचन्द्र राई, उपप्रबन्ध निर्देशक नोर्बु छिरिङ शेर्पा, सृजना श्रेष्ठ शेर्पा लगायत १७९ जना कर्मचारीहरुले समेत रक्तदान गरी स्व.शेर्पाको स्मरण गरे।
