माथिल्लो तामाकोसी जलविद्युत आयोजनाबाट आगामी असार मसान्तसम्म विद्युत परीक्षण गरिने भएको छ।
असार मसान्तमा सम्पूर्ण परीक्षणको काम सक्ने तयारीका साथ काम भइरहेको आयोजनाले जनाएको छ। आयोजना प्रमुख विज्ञान श्रेष्ठले चिनियाँ ठेकेदारका कारण कुनै समस्या नदेखिएको बताए।
चीनबाट फर्केकाहरुलाई १५ दिन क्वारेन्टाइनमा राखेपछि मात्रै काममा संलग्न गराइएको उनले बताए। ‘थोरै समस्या कन्सल्ट्यान्टहरुबाट भएको छ। युरोपमा कोरोनाको प्रभाव बढी छ, अहिले अनलाइनबाट भएपनि उहाँहरुले काम गरिरनुभएको छ। त्यो वातावरण मिलाएका छौँ’ उनले भने।
आयोजना अनुगमनका लागि आइतबार निर्माणस्थलमा पुगेका उर्जा, जलस्रोत तथा सिँचाईमन्त्री वर्षमान पुनले माथिल्लो तामाकोसीको काम सन्तोषजनक ढंगले भइरहेको बताए।
उनले भने ‘निर्धारित समयमै पुरा गर्ने संकल्पका साथ काम भइरहेको छ। आइतबार ड्यामको परीक्षण भएको छ। पुनले आगामी वर्षबाट विद्युत उत्पादन मात्रै नभएर विद्युत निर्यात गर्ने अवस्थमा पुगिने बताए।
नेपाल विद्युत प्राधिकरणका प्रबन्ध निर्देशक कुलमान घिसिङले अहिलेसम्म गरिएका सबै परीक्षणहरु सफल भएको बताए।
विभिन्न युनिटमा काम भइरहेको आयोजनाको असार मसान्तमा एक युनिटको मात्रै काम सम्पन्न गरेर भए पनि परीक्षण गर्ने लक्ष्य लिइएको छ।
आइतबार उर्जामन्त्री पुन, प्राधिकरणका प्रवन्ध निर्देशक घिसिङ, योजना आयोगका उपाध्यक्ष लगायत अन्य सरकारी अधिकारीहरुले आयोजनाको निरीक्षण गरे।