पछिल्लो समय डिजेल तथा पेट्रोलको माग घटेको छ भने ग्यासको माग बढेको छ। विश्वभर फैलिएको कोरोना भाइसरको प्रभाव इन्धनमा देखिएको छ।
गत डिसेम्बरको अन्तमा चीनको वुहानबाट सुरूभएको कोरोना भाइरस विश्वभर फैलिएसँगै आवत जावतमा कमि आएपछि डिजेल तथा पेट्रोलको माग घटेको हो।
उद्योग, वाणिज्य तथा आपूर्ति मन्त्रालयले सार्वजनिक गरेको दैनिक उपभोग्य वस्तुको मोज्दात स्थिति विवरणले डिजेल तथा पेट्रोलको माग घटेको देखाएको छ भने ग्यासको बढेको देखाएको छ।
विवरण अनुसार पेट्रोलियम पदार्थ हाल ४९ हजार ९ सय ८० किलोलिटर मौज्दात रहेको छ।
पेट्रोलको माग प्रतिदिन ४ हजार किलोलिटर रहेकोमा हाल २ हजार ७ सय २१ किलि खपत भइरहेको छ। ५ हजार ९ सय ४७ किलोलिटर मौज्दात रहेको छ।
त्यस्तै डिजेल प्रतिदिन १० हजार किलोलिटर माग रहेकोमा हाल ८ हजार ६ सय ३७ किलि खपत भएको छ। ३४ हजार १ सय ७४ किलोलिटर मौज्दात रहेको छ। हवाई इन्धन दैनिक ८ सय खपत हुने गरेकोमा हाल करिब २ सय किलि हुने गरेको विवरणमा उल्लेख छ। ७ हजार १ सय ७६ किलि हवाई इन्धन मौज्दात रहेको छ।
एलपी ग्यास दैनिक १३ सय मेट माग रहेकोमा हाल ३१ हजार २ सय २४ मेट माग हुने गरेको छ। यसले ग्यासको खपत दुई गुणाभन्दा बढीले बढेको देखाउँछ। ग्यासको मासिक कोटा ३८ हजार मेट रहेको छ।
कोरोना भाइरसबाट बच्न उच्च शतर्कता अपनाउँदै नेपाल सरकारले मङ्गलबारबाट एकसाताका लागि ‘लकडाउन’ गरेको छ। यसले पनि इन्धनको माग अझै घट्ने देखाउँछ।
यससँगै सरकारले उपभोक्तालाई नआत्तिन समेत आग्रह गरेको छ। सरकारले दैनिक उपभोग गर्ने वस्तुको आपूर्तिमा कुनै समस्या नभएकाले उपभोक्तालाई नआत्तिन आग्रह गरेको हो।
चामल ३ महिनाको माग धान्ने २५ हजार ७ सय ३३ मेट्रिक टन रहेको छ। चिनीको माग मासिक २० मेट रहेकोमा ५ हजार मेट गोदाममा रहेको छ भने ५ हजार मेट आउने क्रममा रहेको छ।
त्यस्तै, नुन १० महिनाको माग धान्न पुग्ने १ लाख ५९ हजार मेट मौज्दात रहेको विवरणमा उल्लेख छ।
