त्रिभुवन अन्तर्राष्ट्रिय विमानस्थलमा आज १० अन्तर्राष्ट्रिय उडान हुने छन्। विमानस्थलमा उडान र अवतरण गरी १० उडान हुने तालिका रहेको छ। अहिलेसम्म ९ उडान भइसकेका छन् भने नेपाल एयरलाइन्सको सुडान जाने उडान भने राति हुने छ।
विमानस्थल कार्यालयले दिएको जानकारी अनुसार आज हिमालय एयरलाइन्सको उडानबाट २४ जना बांगलादेशबाट फर्किएका छन्। हिमालयले ढाका जाँदा पनि १२३ जना लिएको थियो।
हिमालयको बाहेक अरु कार्गो उडान छन्। कार्गो उडान गर्नेमा नेपाल एयरलाइन्स, लेनमेइ एयरलाइन्स,श्रीलंकन एयरलाइन्स र कतार एयरवेज छन्।
मंगलबारमात्र क्वारेन्टाइन तथा आइसोलेसन सेन्टर नभएको भन्दै दुबइबाट आउने तयार भएका २६० जना नेपालीलाई आउन रोकिएको थियो। सिसिएमसीको निर्देशन भन्दै विमानस्थल कार्यालयले दुबइ पुगेको नेपाल एयरलाइन्सको जहाजलाई खाली आउन निर्देशन दिएको थियो।
भोलिका लागि नेपाल एयरलाइन्स सुडाबाट फर्किने तालिका छ भने कतारको एक उडान रहेको छ।
विमानस्थल कार्यालयका अनुसार आज विमानस्थलमा ६ हेलिकप्टर उडान भएका छन् भने २ आन्तरिक उडान भएका छन्।
