सरकारले विश्वव्यापी रूपमा फैलिएको कोरोनाको कहरबीच पनि दशैं तिहार लक्षित सहुलियत पसल सञ्चालन गर्ने योजना बनाएको छ। चाडपर्वमा उपभोक्ता नठगिउन् र थोरै भएपनि केही राहत पुगोस् भन्ने उद्देश्यले सहुलियत पसल सञ्चालन गर्ने योजना बनाएको हो।
सहुलियत पसल सञ्चालन गर्ने बारे उद्योग, वाणिज्य तथा आपूर्ति मन्त्रालयल, वाणिज्य विभाग, खाद्य व्यवस्था तथा व्यापार कम्पनी लिमिटेड, साल्ट ट्रेडिङ कर्पोरेशसन र नेपाल दूग्ध संस्थान (डिडिसी)बीच बिहीबार छलफल भएको थियो।
‘अस्ति हामीले प्रारम्भिक छलफल गरेका छौं। कहाँ कहाँ राख्ने, कुन मोडालिटीमा राख्ने भन्ने विषयमा मंगलबार छलफल हुन्छ,’ खाद्य व्यवस्था तथा व्यापार कम्पनी लिमिटेडका प्रमुख कार्यकारी अधिकृत नेत्र प्रसाद सुवेदीले भने।
उनकाअनुसार सहुलियत पसलका लागि साल्ट ट्रेडिङले २० हजार टन र खाद्य कम्पनीले १० हजार टन चिनी ल्याउने छ। त्यस्तै, ३० हजार खसी बोका र च्याङ्ग्रा खाद्य कम्पनीले ल्याउने भएको छ। अन्य खाद्य वस्तुको मौज्दात भने पर्याप्त छ।
सुपथ पसलमा साल्ट ट्रेडिङ, खाद्य व्यवस्था तथा व्यापार कम्पनी र डिडिसीले आफ्ना उत्पादनमा विशेष छुट दिने गरेका छन्। यी तीनवटै संस्थाले रामशाहपथस्थित बग्गीखानाको खाली जग्गामा एकीकृत पसल राख्दै आएका छन्। अन्य ठाउँमा भने आफ्नै बिक्रीकेन्द्रमा सहुलियत पसल सञ्चालन हुने छ।
ती संस्थानले घटस्थापना आउनुभन्दा १५ दिन अघिबाट सहुलियत पसल राख्ने गरेका छन्। यस वर्ष तीनवटै संस्थानले एक अर्काका सामान बेच्ने योजना बनाएको उनले जानकारी दिए।
कोरोनाका कारण यस वर्ष बिक्री केन्द्रलाई भन्दा पनि डेलिभरीलाई प्राथमिकता दिइने सरकारको योजना छ।
‘कोरोनाको कारण पसलमा भीड हुन नदिन डेलिभरीलाई बढी प्राथमिकता दिने सोंच बनाएका छौं,’ उनले भने।
सरकारी कम्पनी खाद्य व्यवस्था तथा व्यापार कम्पनीले अनलाइन सेवा सञ्चालनमा ल्याएको छ। सहुलियत पसलमा राखिएको मूल्यमै उपभोक्तालाई निशुल्क डेलिभरी गरिने कम्पनीका प्रमुख सुवेदीले बताए।
त्यस्तै, साल्ट ट्रेडिङले भ्यानमार्फत उपभोक्ताको घरघरमा डेलिभरी गरिदिने छ।