देश देश भन्थिस् त, कहाँ छ बबुवा तेरो देश ?
म त केही देख्दिनँ त यहाँ, अगाडि त निष्पट अँध्यारो पो छ त !
अँ, केही सल्बलाइरहेको चाहिँ छ, के हो, को हो, केही ठम्याउन सकिरहेको छैन
गोहीहरू हुन् कि सर्पहरू हुन् कि !
एSS, अहिले त स्यालहरू जस्ता पो देखिए त, कतै व्वाँसाहरू पो हुन् कि!
अरिङ्गालहरू पो हुन् कि भुनभुनाइरहेका
ठूला–जुरे साँढेहरू पो मान्दैछु है अहिले त, डुक्रिरहेका र सिंगौरी खेलिरहेका
ती कता कता मान्छे नै पो हुन् कि ? के अचम्म हो यो ?
धत् यस्तो पनि हुन्छ कहीँ !
ती जे सुकै होऊन् तर तैले देश देश भन्दै गीत गाउँदै आएको देश चाहिँ होइन
देश देश भनेर हिँडेर के नापिस् हँ ?
मात्र पैताला नापिस्, बगर नापिस्, जङ्गल नापिस्, चोरबाटो नापिस्,
कति दिन हिँडिस् रे ? दुई दिन ? चार दिन ? सात दिन ?
तातो अलकत्रा हिँडिस्, काँडाघारी हिँडिस्, गेग्य्रान हिँडिस्,
के खाइस् रे ? गाली खाइस्, लट्ठी खाइस्, घोक्य्राइ खाइस्
अँ चाउचाउ र चिउरा, नुन खुर्सानी र पानी पनि खाइस्
धेरै त आफ्नै प्रश्न खाइस्, आफ्नै ग्लानी खाइस्, आफ्नै आँसु खाइस्,
को छ बबुवा तेरो देशमा जसले तँलाई तँ भनेर चिन्छ, सम्झन्छ, र माया गर्छ ?
तिनै जसले तँलाई देश निकाला गरे ?
बब्बा, मलाई कसले देश निकाल्छ हँ ?
मै त हुँ देश
अनि, जो यो तिमी भन्दैछौ नि मलाई देश निकाला गर्नेहरू भनेर
ती कोही हैनन्, केही हैनन्, तिनको केही हैसियत छैन बब्बा
जुन शून्यबाट ती आएका थिए त्यही शून्यमा ती बिलाउनेछन्।
देश त म हो बब्बा, आगो बोक्ने मेरो छाती हो, आँधी बोक्ने मेरो मन हो
देश त मेरा पाखुरी हुन्, मेरा पैताला हुन्
देश मसँगै हिँडिरहेको यो लर्कन हो
देश सानी छोरी काँधमा हालेर हिँडिरहेको त्यो बाबु हो
देश आफ्नो मर्दलाई डोर्याउँदै हिँडेकी त्यो युवती हो
देश त्यो केटो हो जसको आँखामा ज्वाला छ
देश त्यो केटी हो जसको आँत हुरहुरी बलिरहेको छ।
मेरी माई मेरो देश हो, बब्बा तिमी मेरो देश हौ
तिमीहरू छौ र त म छु
मेरी बिटियाकी अम्मा मेरो देश हो जसको प्यारले मलाई आँट दिइरहन्छ
मेरी बिटिया मेरो देश हो जसको हाँसो मेरो प्राण हो
मेरो खेत–खलिहान मेरो देश हो जहाँ हामी सबैको पसिना छ
मेरो आकाश मेरो देश हो जसले हामीलाई जीवन दिएको छ
आकाशका चराचुरूङ्गी मेरो देश हो जसले जीवन जिउने कला दिएको छ।
साँढेहरू जतिसुकै डुक्रिउन्, जतिसुकै सिंगौरी खेलून् मलाई केही फरक पर्दैन
अरिङ्गालहरू जतिसुकै भुनभुनाउन् वा बाटै छेकून् मलाई केही फरक पर्दैन
मेरो देश त मैसँग छ।