नारायणगढ–मुग्लिङ सडक खण्ड पहिरोका कारण पुनः अवरुद्ध भएको छ। शनिबार साँझ गएको पहिरो पन्छाएर आइतबार बिहान सुचारु गरिएको यातायात अपरान्ह फेरि पहिरो जाँदा सडक अवरुद्ध भएको हो।
तराईलाई काठमाडौँसँग जोड्ने मुख्य राजमार्गको रुपमा रहेको नारायणगढ–मुग्लिङ सडक खण्डमा आइतबार दिउँसो तीन बजे पहिरो गएपछि पुनः यातायात अवरुद्ध भएको हो।
मुग्लिङ बजारबाट करिब चार किलोमिटर नारायणगढतर्फ ईच्छाकामना गाउँपालिका वडा नम्बर ६ कालीखोला नजिक गएको पहिरोले सवारी अवागमन ठप्प पारेको छ। पहाड काटेर सडक चौडा पार्ने काम भइरहेको स्थानमा माथिबाट ठूलो पहिरो झरेपछि सडक अवरुद्ध भएको जिल्ला ट्राफिक प्रहरी कार्यालय चितवनले जनाएको छ।
सोही स्थानमा गएको पहिरोमा परेर प्रहरीको गाडीसहित दुई जना प्रहरी बेपत्ता भएका थिए भने दुई जनाको मृत्यु भएको थियो। पहिरो हटाएर अवरुद्ध सडक सञ्चालनका लागि सोमबार बिहानसम्म लाग्ने अनुमान गरिएको छ । प्रहरीले नारायणगढ–मुग्लिङ सडकको विकल्पमा अन्य सडक प्रयोग गर्न समेत सबैमा अपिल गरेको छ।
