संघीयसभा सांसद तथा नेकपाका नेता घनश्याम भुसालले विदेशीको अनुदान सहयोगले मात्रै राष्ट्र समृद्ध बन्न नसक्ने बताएका छन्।
‘अनुदानले देश बन्दैन,अनुदानमा के/के सर्त हुन्छन् ,बरु ऋण ठीक हो,देशले पचाउन सक्ने सामर्थ्य भए ऋणले राष्ट्र डुब्दैन ।’
ऋण ल्याएर भत्ता बाड्ने,भ्रष्टाचार गर्ने काम भए मुलुक सत्यानाशै र बर्बादै हुने उनको भनाइ छ ।
बुटवलमा बुधबार आयोजित साक्षात्कार कार्यक्रममा बोल्दै नेता भुसालले सो कुरा बताएका हुन्।
‘प्रचण्डले कार्यकारी राष्ट्रपतिको कुरा निकाल्नु असान्दर्भिक’
नेकपाका अध्यक्ष पुष्पकमल दाहाल प्रचण्डले कार्यकारी राष्ट्रपतिको कुरा निकाल्नु अहिलेको सन्दर्भ भन्दा फरक भएको उनको भनाइ छ ।
‘अहिले संविधान कार्यान्वयन गर्ने बेला हो ,पहिला यसलाई कार्यान्वयन गरौं यदि भएन भने त्यतिबेला गरौंला,यसलाई कसले रोकेको छ र ,उहाँनै अध्यक्ष हुनुहुन्छ ।’
यसबारे भित्रि सहमति भएको हो भन्ने प्रश्नमा भुसालले कुनै सहमति नभएको र जे हुन्छ सहमति मै हुने दाबी गरे ।
अहिलेसम्म चीनसंग नेपालको सम्बन्ध समस्या रहित रहेको भन्दै उनले भने—‘चीनबाट पुल मागेर,हाइड्रो ,रेल मागेर हामी धनी हुँदैनौं ,रेलमा त हामी नै हिँड्ने होलानी ?’
तिनाउ दोहनले लज्जित
बुटवलको तिनाउ नदीको दोहन गरि ब्रह्मलुट मच्चाइएको भन्दै उनले आफूलाई पनि लज्जित बनाएको बताए ।
‘अर्बौको लुट हुँदा मिडिया पनि कम आयो ,नेता पनि कम बोले, एक्लै भएको छैन यहाँ पुलिस होलान्,कर्मचारी होलान्,अब यसलाई तत्कालै रोकिनेछ’ उनले भने ।
स्थानीय तहमा पुगेका अधिकार अभ्यास गर्न अन्यौल भएको भन्दै उनले अधिकार दुरुपयोग नगर्न जनप्रतिनिधिलाई आग्रह समेत गरे ।