स्थानीय तहले लगाएको करको विषयमा विवाद भएको गुनासो आएपछि निर्वाचित जनप्रतिनिधिहरूको संस्था गाउँपालिका राष्ट्रिय महासंघ नेपालले दोहोरो कर हटाउन आग्रह गरेको छ।
संविधानले दिएको अधिकारअनुसार नै स्थानीय तहहरूले कर लगाउँदै आएको महासंघले बताएको हो।
सोमबार प्रेस विज्ञप्ति जारी गरी महासंघका अध्यक्ष होमनारायण श्रेष्ठले प्रदेश र स्थानीय तहले दोहोरो कर लगाएको भन्ने देखिएकोले जनताका गुनासा जायज मान्नुपर्ने उल्लेख छ।
‘दोहोरो कर अन्त्यका लागि तीन वटै तहका सरकारबीच समन्वय र समझदारी हुनुपर्छ’ विज्ञप्तिमा भनिएको छ।
स्थानीय तहले लगाएको करको विषयमा अध्ययन गर्न पनि संघले आग्रह गरेको छ। कानूनविपरीत हुने गरी कर लगाइएको पाइएमा सुधार गर्न सुझाव दिन सकिने विज्ञप्तिमा उल्लेख छ।
त्यस्तै, वैज्ञानिक कर लागू गरी स्थानीय तहलाई सक्षम बनाउने कार्यमा जनप्रतिनिधिलाई सहयोग गर्न राजनीतिक पार्टीलाई पनि आग्रह गरिएको छ।
स्वभाविक र सामान्य कर निर्धारणलाई ‘प्रोपोगाण्डा’ नबनाउन महासंघले आग्रह गरेको छ।