नेपाली कांग्रेसका सभापति शेरबहादुर देउवाले अहिंसात्मक आन्दोलनबाट प्राप्त उपलब्धी स्थायी र दीगो हुने बताएका छन्।
अहिंसालाई आत्मसाथ गरेर नै भारतमा महात्मा गान्धीले अंग्रेज शासन हटाएको उनले बताए।
अन्तराष्ट्रिय अहिंसा दिवस तथा १५० औं गान्धी जयन्तीको अबसरमा महेन्द्रनारायण निधि स्मृति प्रतिष्ठानले राजधानीमा मंगलबार आयोजना गरेको छलफलमा सभापति देउवाले नेपालमा २०४६ र २०६२/०६३ मा शान्तपूर्वक अहिंसात्मक आन्दोलन गरिएको जिकीर गरे।
‘शान्तपूर्वक गरिएको आन्दोलनबाट नै ठूला उपलब्धी हासिल भएका छन्, यो दीगो पनि हुन्छ’, देउवाले भने, ‘शान्तपूर्वक चलेको आन्दोलनले नै नेपालमा लोकतन्त्र ल्याएको हो।’
हिंसात्मक आन्दोलनबाट उपलब्धी हासिल गर्न नसकिने देउवाले बताए। ‘गान्धीले देखाएको बाटो अहिंसाको बाटो हो। यही बाटोबाट प्राप्त भएका उपलब्धी मात्रै दीगो हुन्छ’, उनले भने। महेन्द्रनारायण निधि जस्तै धेरै गान्धीबादी नेताले कांग्रेसमा योगदान दिएको उनले चर्चा गरे।
प्रतिष्ठानका मानार्थ अध्यक्ष तथा कांग्रेस उपसभापति विमलेन्द्र निधिले क्रान्ति र परिवर्तनका लागि अहिंसा तथा शान्तिको बाटो नै उत्तम हुने तर्क गरे। ‘अहिंसा र शान्तिको बाटोबाट क्रान्ति र परिवर्तन गर्न सकिन्छ। जसमा जनताको पनि सहभागिता हुन्छ’, निधिले भने।
प्रतिष्ठानले आयोजना गरेको कार्यक्रममा भारतीय जनता पार्टी र भारतीय राष्ट्रिय कांग्रेसका नेताहरुको पनि सहभागिता थियो। भाजपाका नेता तरुण विजयले भारतमा जन्मिएका गान्धी नेपालमा अझै जिवित रहेको बताए।
‘गान्धी भारतमा जन्मिए तर नेपालको लोकतन्त्र तथा संविधानमा गान्धी जिवितै हुनुहुन्छ’, विजयले भने। भारतीय कांग्रेसका नेता चन्दनकुमारले लोकतन्त्र र गान्धी एक सिक्काको दुई पाटा भएको तर्क गरे।
नेपालका लागि भारतीय राजदुत मञ्जितसिं पुरीले गान्धीले राजनीतिक र सामाजिक परिवर्तन ल्याउन दिएको योगदानको स्मरण गरे। कार्यक्रममा कांग्रेस नेता प्रदीप गिरि, नेकपा नेता घनश्याम भुसालले गान्धीबारे धारणा राखे।
