नेपाली कांग्रेसको भातृ संस्था नेपाल विद्यार्थी संघले छ महिनाभित्र १२ औं महाधिवेशन गर्ने गरी तदर्थ समिति गठन गर्न माग गरेको छ।
११ औं महाधिवेशनमा निर्वाचित अध्यक्ष नैनसिंह महरइतर समूहले सोमबार काठमाडौंमा पत्रकार सम्मेलन गरेर नेविसंघ विधानअनुसार ३२ वर्षे उमेरहद कायम राखेर तदर्थ समिति गठन गर्न माग गरेको छ।
निवर्तमान महामन्त्री कुन्दनराज काफ्लेले ११ औं महाधिवेशनमा आफूले १७ सयभन्दा बढी मत ल्याएकोले त्यसको भावनाअनुसार नै तदर्थ समिति गठन गर्न माग गरे।
'त्यसबेला सबभन्दा बढी भोट हामीले ल्याएका थियौं। अब तदर्थ समिति बनाउँदा पनि त्यो मतको कदर हुनुपर्छ,' उनले भने।
पार्टीभित्र रहेको गुटगट छाया नेविसंघको संगठनमा लाद्न खोजे स्वीकार्य नहुने उनले बताए।
उनले ३२ वर्ष माथिका व्यक्तिको हातमा नेविसंघको तदर्थ समिति बनाए समानान्तर समिति गठन गर्ने चेतावनी दिएका छन्।
२१ जिल्लामा नेविसंघको अधिवेशन भए पनि बाँकी जिल्लामा भने समिति रिक्त छ।
पार्टीले अनावश्यक हस्तक्षेप गर्दा नेविसंघको संगठनमा असर परेको उनको भनाइ छ।