श्रीलंकाका राष्ट्रपति मैत्रीपाल सिरिसेनाले रक्षा सचिव र प्रहरी प्रमुखलाई राजिनामा दिन भनेका छन्।
राष्ट्रपति सिरिसेनाले रक्षा सचिव र प्रहरी प्रमुखलाई बोलाएर राजीनामा दिन भनेको अन्तराष्ट्रिय सञ्चारमाध्यामले जनाएका छन्।
बुधवार टेलिभिजनमार्फत सम्बोधन गर्दै उनले २४ घण्टा भित्र सुरक्षा निकायहरूमा परिवर्तन गर्ने र आउने दिनमा सुरक्षा निकायको पुनर्संरचना गर्ने बताएका थिए।
सो सम्बोधनमा उनले भनेका थिए - आक्रमणबारे विदेशी मुलुकबाट प्राप्त सूचना सुरक्षा निकायले मलाई दिएनन्। सूचना प्राप्त भएको भए त्यहीबेला कदम चाल्न हुन्थ्यो।
भारत र अमेरिकाबाट श्रीलंकालाई आक्रमणको सम्भावनाबारे सूचना आएको थियो भन्ने अन्तराष्ट्रिय सञ्चारमाध्यामहरूले जनाएका छन्।
केही दिनअघि भारतमा पक्राउ परेका एकजना व्यक्तिले इस्लामिक स्टेटले श्रीलंकामा आक्रमण गर्दै छ भन्ने सूचना चुहाएका थिए।
सो सूचनासहित तीनवटा सूचना भारतीय अधिकारीहरूले श्रीलंकाका सुरक्षा निकायहरूलाई दिएको थियो। पहिलो सूचना आक्रमण हुनुभन्दा १६ दिन अगाडि, दोस्रो सूचना आक्रमण हुनु एक दिन अघि र तेस्रो सूचना आक्रमणको एक घण्टाअघि श्रीलंकन अधिकारीहरूलाई दिएको सिएनएनले जनाएको छ। सो सूचनामा चर्च र होटलहरूमा आक्रमण हुनसक्ने बताइएको थियो।
आइतबार चारवटा चर्च तथा होटलहरूमा भएको आक्रमणबाट मर्नेहरूको संख्या तीनसय २१ पुगेको छ। त्यसमध्ये ३८ जना विदेशी छन्। इस्लामिक स्टेटका ८ जना समर्थक सो आक्रमणमा सरिक भएको सञ्चारमाध्यामले जनाएका छन्।
आत्मघाती बम विष्फोट गर्नेहरूमा २ जना श्रीलंकाका एक धनी व्यापारीका छोराहरू पनि छन्। इस्लामिक स्टेटका कतिपय समर्थकहरू अझै श्रीलंकामा काम गरिरहेको र तिनीहरूले श्रीलंकामा आक्रमण गर्नसक्ने भन्दै प्रधानमन्त्री रनिल विक्रमासिंघेले नागरिकहरूलाई सचेत गराएका छन्।
पत्रकार सम्मेलन गर्दै उनले भने - अझैपनि केही आतंकवादीहरू बम लिएर हिँडिरहेका हुन सक्छन् हामी सचेत रहनुपर्छ।
विष्फोटक सामाग्री बोकेका दुईवटा गाडी अझै कोलम्बोमा लुकाएर राखिएको आशंका सुरक्षानिकायहरूले गरेका छन्।
पुन: आक्रमण हुनसक्ने यी सूचनाले आम मानिसहरूमा त्रास फैलिएको छ। श्रीलंकाभरी संकटकाल र कर्फ्यु लगाइएको छ। सुरक्षा निकायहरूले सम्भावित आक्रमणकारीहरूको खोजी तिव्र बनाएका छन्।
