नेपाल कम्युनिस्ट पार्टी (नेकपा) का महासचिव विष्णु पौडेलले बदलिएको भूमिकाअनुसार पार्टीका युवा संगठनलाई अघि बढ्न आग्रह गरेका छन्।
युवा संघ नेपालले काठमाडौंमा बुधबार गरेको कार्यक्रममा महासचिव पौडेलले हिजो पार्टी सरकारमा नहुँदा सडकमा आन्दोलन गरेजस्तो अहिले अवस्था नरहेको बताए।
‘सडक आन्दोलन गरिराख्नुपर्ने अवस्था छैन,’ उनले भने, ‘अहिले हामी सरकारमा छौं। सरकारसँग युवाहरूले प्रतिपक्ष भूमिका खेल्ने होइन। एकै ठाउँमा बसेर छलफल गर्ने भूमिकामा युवाहरू रहनुपर्छ।’
उनले नेकपा एमाले र एमाओवादी केन्द्र एकता भएको जेठ ३ गते एक वर्ष पुग्ने भन्दै त्यो दिनसम्म पार्टीका सबै क्षेत्रमा एकता सकिने पनि बताए।
‘पार्टी एकता भएको एक वर्षमा पनि भातृ संगठनहरू एकता सकिएन भन्ने गुनासो छ,’ उनले भने, ‘एकता केही घण्टा र केही दिनका कुरा हुन् छिट्टै सकिन्छ।’
एकतापछि बन्ने युवा संगठन शक्तिशाली हुने उनले दाबी गरे।
युवा संघ र वाइसिएलबीच एकता गरेपछि बन्ने संगठनले युवाहरूको चाहनाअनुसार काम गर्ने पनि उनले बताए।