शिक्षा तथा स्वास्थ्य समितिकी सभापति जयपुरी घर्तीले समितिमा अनिवार्य उपस्थितिका लागि सबै सदस्यहरूलाई निर्देशन दिएकी छन्।
समितिका छलफल तथा बैठकहरूमा सदस्यहरू अनुपस्थित हुन थालेपछि सभापति घर्तीले सक्रिय सहभागिता जनाउन निर्देशन दिएकी हुन्।
आइतबार समितिको वार्षिक प्रतिवेदनको मस्यौदामाथिको छलफलमा पनि सदस्यहरू अनुपस्थित भएपछि सभापति घर्तीले सक्रिय उपस्थितिको लागि निर्देशन दिएकी हुन्।
उनले भनिन्, ‘समिति भनेको मिनी संसद हो। मिनी संसदमा सक्रियतापूर्वक आफ्नो उपस्थिति र भाग लिने र टाइमलाई म्यानेज गर्ने कुरालाई म सबै माननियज्यूलाई विनम्र अनुरोध गर्दछु।’
बैठकमा समिति सदस्य योगेश भट्टराईले कारबाही महत्वहीन र प्रभावकारी नदेखेर समितिका बैठकमा अनुपस्थित भएको हो भने थप प्रभावकारी बनाउन सुझाव दिए।
आइतबारको बैठकमा समितिको वार्षिक प्रतिवेदनको मस्यौदामाथिको छलफल गर्ने कार्यसूची थियो।
छलफलमा सहभागी सदस्यहरू खगराज अधिकारी, मान बहादुर विक, उमाकान्त चौधरी, चित्रलेखा यादव, उमेश श्रेष्ठलगायतले निर्देशन कार्यान्वय गर्ने र नगर्नेहरूको नाम नै किटानीका साथ उल्लेख गर्नुपर्नेमा जोड दिएका थिए।
