प्रमुख प्रतिपक्षी दल नेपाली कांग्रेसले पाँचथर मिक्लाजुङ गाउँपालिका -३ आरुबोटेमा दुइटा परिवारका ९ जनाको हत्या गर्नेलाई कारबाहीको दायरामा ल्याउन सरकारसँग माग गरेको छ।
कांग्रेस संसदीय दलकी सचेतक पुष्पा भुसाल गौतमले मंगरबारको प्रतिनिधिसभा बैठकमा सोमबार राति अज्ञात समूहले ९ जनाको हत्या गरेको भन्दै सरकारले हत्याराको पहिचान गरी छिटो कारबाही गर्नु पर्ने बताइन्।
‘अपराधीलाई कारबाहीको दायरामा ल्याइयोस्,’ उनले भनिन्, ‘घाइते १२ वर्षीया सीता खाजुमको उपचारमा सरकारले ध्यान देओस्।’
अज्ञात समूहले ३६ वर्षीया जस्मिता फियाक, ४१ वर्षीय धनराज शेर्मा, २६ वर्षीया मनकुमारी फियाक, ६ वर्षीया इक्सा शेर्मा, १३ वर्षीया योवना शेर्मा, ८ वर्षीया मुना शेर्मा, ७४ वर्षीय बमबहादुर फियाक, उनकी श्रीमती पुर्सीमाया फियाक र १२ वर्षीया आशिका खजुम लिम्बूलाई धारिलो हतियार प्रयोग गरी हत्या गरेको थियो।
यस्तै कांग्रेसका प्रमुख सचेतक बालकृष्ण खाँणले आन्दोलनरत नर्सको मागलाई पूरा गर्न सरकारले गम्भीरतापूर्वक लिनु पर्ने, अस्थायी र राहत शिक्षकको माग पूरा गर्न माग गरे।
