विश्वको तेस्रो ठूलो प्रजातान्त्रिक देश इन्डोनेसियामा जोको विडोडो मंगलबार पुनः राष्ट्रपति पदमा निर्वाचित भएका छन्।
जकार्ता सहरमा कडा सुरक्षाबीच मंगलबार अप्रत्यासित रूपमा निर्वाचन परिणाम घोषणा गरिएको हो।
सत्तासिन राष्ट्रपति विडोडोले ५५.५ प्रतिशत मत प्राप्त गरी पुनः राष्ट्रपति पदमा विजयी भएको त्यहाँको निर्वाचन आयोगले जनाएको छ।
उनका निकटतम प्रतिद्वन्द्वी पूर्वसैनिक जनरल प्रबोवो सुविआन्तोले ४४.५ प्रतिशत मत प्राप्त गरेका थिए।
निर्वाचन आयोगले मतगणना गरिसकेपछि स्थानीय समयानुसार मंगलबार बिहान १:४६ मा विडोडोलाई पुनः राष्ट्रपतिमा विजय भएको घोषणा गरेको थियो।
इन्डोनेसियाका ३४ वटा प्रान्तका १३० सहरमा मतगणना गरिएको आयोगले जनाएको छ।
सन् २०१४ मा पनि विडोडोले ५३.१५ प्रतिशत मत प्राप्त गरेका थिए भने उनका निकटतम प्रतिद्वन्द्वी प्रबिवो सुबिआन्तोले ४६.८६ प्रतिशत प्राप्त गरेका थिए।
विश्वको सबभन्दा ठूलो मुसलमान बाहुल्य रहेको इन्डोनेसियास्थित अमेरिकी राजदूतावासले उच्च सुरक्षा सतर्कताका लागि आह्वान गरेको थियो।
जकार्तामा निर्वाचन आयोगको कार्यालयलगायत जाकार्ताभर कडा सुरक्षा व्यवस्था गरिएको छ।
सुरक्षाका लागि सयौंको संख्यमा सैनिक तैनाथ गरिएको थियो ।
यद्यपी प्राबोवोले निर्वाचन आयोगको औपचारिक कागजातमा हस्ताक्षर गर्न मानेका छैनन्।
उनले पाँच वटा प्रान्तमा निर्वाचन फेरि गराउनु पर्ने अडान लिएका छन्।
यी प्रान्तमा धाँधली भएको प्राबोवोको दाबी छ। (रासस/एएफपी)