भारतका प्रधानमन्त्री नरेन्द्र मोदी आइतबार सकिएको लोकसभा चुनावको प्रचारका क्रममा प्रतिष्पर्धी कंग्रेस आईका अध्यक्ष राहुल गान्धीविरूद्ध व्यक्तिगत गालीगलौजमा उत्रिए। उनले राफेल डिललगायतका घटनामा भ्रष्टाचारको मुद्दा उठाइरहेका राहुललाई आफ्ना बुवाको इतिहास सम्झन सुझाव दिए। उनले भ्रष्टाचारी नम्बर १ बनेर राजिव गान्धीको अन्त्य भएको बताए।
त्यसको झन्डै तीन सातापछि मोदीले तीनै राजिव गान्धीलाई श्रद्धाञ्जली दिएका छन्। मंगलबार राजिवको २६ औं स्मृति दिवस हो। सोही अवसरमा ट्वीट गर्दै मोदीले भनेका छन्- पूर्वप्रधानमन्त्री राजिव गान्धीको स्मृति दिवसमा श्रद्धाञ्जली!
मोदी सरकारलाई फ्रान्सबाट लडाकु विमान राफेल किन्दा व्यापक अनियमितता गरेको आरोप छ। प्रतिपक्षी दलका अध्यक्ष राहुलले यो मोदी सरकारको ठूलो भ्रष्टाचार भएको बताउँदै आएका थिए।
उत्तर प्रदेशको प्रतापगढमा आयोजित चुनावी सभामा मोदीले भनेका थिए- तपाईंका बुवालाई दरबारीहरूले मिस्टर क्लिन बनाएका थिए। गाजाबाजाकासाथ मिस्टर क्लिन मिस्टर क्लिन चलाएका थिए। तर हेर्दाहेर्दै भ्रष्टाचारी नम्बर १ का रूपमा उनको जीवनकाल समाप्त भयो।
सन् १९८४ देखि १९८९ सम्म प्रधानमन्त्री भएका राजीव गान्धी बोफोर्स हतियार खरिद प्रकरणको अनियमिततामा मुछिएका थिए। यद्यपी अदालतले उनलाई सफाइ दिएको थियो। राजीवको २१ मे १९९१मा तमिलनाडुको चुनावी सभाका क्रममा हत्या गरिएको थियो।
मोदीले गाली दिएर आफ्नो ५० वर्षको संघर्षलाई माटोमा मिलाउन नसकिने बताएका थिए।
‘मेरो छवीमा धब्बा लगाएर यिनीहरूले देशमा अस्थीर र कमजोर सरकार बनाउन चाहेका छन्,’ मोदीले भनेका थिए।
राहुलले मोदीको उक्त गालीको जवाफ ट्वीटरबाट दिएका थिए।
आइतबार बिहान ट्वीट गर्दै राहुलले लेखेका थिए- मोदीजी, लडाइँ सकिएको छ। तपाईंको नियति पर्खिरहेको छ। तपाईंको भित्रि विश्वासलाई मेरो बुवामाथि थोपरेर तपाईं जोगिनुहुन्न। मेरो सम्पूर्ण माया र विशाल आलिंगन! राहुल।