नेपाल कम्युनिस्ट पार्टी (नेकपा)का स्थायी कमिटी सदस्य युवराज ज्ञवालीले चुनावको समयमा कम्युनिस्ट पार्टीले बनाएको घोषणापत्रलाई आत्मसात् गर्दै अघि बढेमा मुलुक समृद्ध बन्ने बताएका छन्।
मंगलबार तुलसीपुरमा आयोजित पत्रकार सम्मेलनमा ज्ञवालीले नेतृत्वले त्यो कुरालाई बुझेर
अगाडि बढ्नु पर्ने आवश्यकता औंल्याए ।
त्यस्तै उनले मुलुकमा भ्रष्टाचार बढ्दै गएको भन्दै यो घटाउन सफल भएमा कम्युनिस्ट पार्टी सफल बन्ने तर्क गरे।
‘हिजोको सत्तामा पुलिसले डण्डा दिन्थ्यो’ उनले भने,‘तर आजको अवस्थामा घरमै ब्रिफकेस ल्याएर आउने अवस्था छ, यसबाट कम्युनिस्टको सत्ता कत्तिको जोगिन सक्छ, त्यसमा भरपर्छ ।’
अहिले कम्युनिस्ट पार्टीको सरकारमा चुनौती र अवसर दुवै रहेको भन्दै यो अवसरलाई प्रयोग गर्न सके १० वर्षमा नेपालमा कायापलट हुनेसमेत उनको भनाइ थियो।
कार्यक्रममा मिडिया काउन्सिल विधेयकमा पार्टीमा छलफल नभएको समेत उनले बताए।
नेता ज्ञवालीले सरकारले १० वटा राम्रा काम गरे पनि एउटा नराम्रो कामले असफल बनाउने भन्दै
यसतर्फ जनप्रतिनिधि सजक बन्नुपर्ने बताए।
‘हाम्रो शरीर स्वस्थ छ भनेर ढुक्क रहने अवस्था हुँदैन, हाम्रो शरीर स्वस्थ्य भए पनि एउटा प्रेसरले हामीलाई ढालिदिन्छ’ उनले भने‘ राजनीतिमा पनि यो लागू हुन्छ, त्यसलै हामीले १० वटा काम गरे पनि हामीले एउटा नराम्रो काम गर्यौं भने हामीले गरेका १० वटा राम्रा काम जनताले देख्दैनन् जनताले देख्ने भनेको एउटा नराम्रो काम हो, यसमा जनप्रतिनिधिले ध्यान दिनुपर्छ।’
जनप्रतिनिधि जनताको सेवामा दत्तचित्त भएर काम गर्नुपर्ने बताए।
