प्रदेश २ का समानुपातिक प्रदेशसभा सदस्यहरूले आफूहरूलाई भेदभाव गरिएको भन्दै त्यसविरूद्ध आन्दोलन गर्ने चेतावनी दिएका छन्।
बिहिबार प्रदेशसभाको बैठक बसेलगत्तै समानुपातिक प्रदेशसभा सदस्यहरूले आफूहरूसँग सदनमै विभेद गरिएको आरोप लगाउँदै आन्दोलन गर्ने चेतावनी दिएका हुन्।
प्रत्यक्ष र समानुपातिक प्रदेशसभा सदस्यहरूबीच विभेद गरिएको भन्दै सत्तारूढ राजपाकी प्रदेशसभा सदस्य रिना यादवले विभेद अन्त्य नभए आन्दोलन गर्ने चेतावनी दिइन्।
‘हामीहरूको सवालमा कुनै सम्बोधन नभए दुई दिनपछि सम्पूर्ण समानुपातिक प्रदेशसभा सदस्यहरू आन्दोलनमा होमिन्छौं,’ उनले भनिन्।
आन्दोलन गरेर नै सदनसम्म पुगेको भन्दै आफ्नो माग सम्बोधन गराउन आन्दोलन गर्न पछाडि नहट्ने उनको भनाइ थियो।
‘त्यस्तै छ भने समानुपातिक प्रदेशसभा सदस्यहरूको सिट र प्रत्यक्ष प्रदेशसभा सदस्यहरूको सिट छुट्याइयोस् जसले हामीले हाम्रो औकातको स्मरण गराइ रहन्छ,’उनले भनिन्,‘विभेदविरूद्ध हामीहरूले आन्दोलन गरेका थियौं तर सदनमा समेत हामीहरू विभेद नै झेलिरहेका छौं।’
नेकपाका प्रदेशसभा सदस्य जगत यादवले सदनमै पटक पटक अपमान गरिँदै आएको आरोप लगाए। ‘प्रत्यक्षबाट जितेर आएका प्रदेशसभा सदस्यहरूलाई विकास बजेट दिइने तर हामीहरूलाई विकास बजेट नदिएर अपमान गरिएको छ’,उनको आरोप छ।
निर्वाचन क्षेत्रमा सरकारले विनियोजन गरेका बजेटहरूमा समानुपातिक प्रदेशसभा सदस्यहरूलाई सहभागी नगराइ सरकार एकलौटी हिँड्न खोजेको उनले आरोप लगाए।
कांग्रेस प्रदेशसभा सदस्य सरस्वती चौधरीले समानुपातिक प्रदेशसभा सदस्यहरूसँगको विभेद अन्त्य नभए रोस्ट्रम घेराउसम्म गर्ने चेतावनी दिइन्।
