भारतीय फुटलबलका पूर्व कप्तान एवम् स्ट्राइकर भाइचुङ भुटियाको ‘हाम्रो सिक्किम पार्टी’ सिक्किम विधानसभा तथा लोकसभा चुनावमा पराजित भएको छ।
उनको पार्टीले एउटा पनि सिटमा जित दर्ता गर्न सकेन। बिहिबार आएको निर्वाचन परिणाम अनुसार सिक्किममा सिक्किम क्रान्तिकारी परिषद् बहुमत हासिल गरेको छ।
३२ सिटका लागि भएको निर्वाचनमा पवन चाम्लिङ नेतृत्वको सिक्किम डेमोक्रेटिक फ्रन्ट १५ सिटमा सिमित भएपछि प्रेम सिंह तामाङ गोले नेतृत्वको सिक्किम क्रान्तिकारी परिषद्ले सरकार बनाउने भएको हो।
भुटियाको यो लगातार तेश्रो हार हो। यसअघि उनले पश्चिम बंगालकी मूख्यमन्त्री ममता बेनर्जी नेतृत्वको तृणमूल कांग्रेसबाट दार्जिलिङ्मा सन् २०१४ मा उम्मेदवार बनेका थिए।
सो निर्वाचनमा उनी भारतीय जनता पार्टी (भाजपा)का एस एस आलुवालियासँग १.९० भोटले पराजित भएका थिए। उनी सन् २०१३ मा तृणमूल प्रवेश गरेका थिए।
पहिलो निर्वाचनमा पराजित भएका भुटियालाई त्यसपछि तृणमूलले सन् २०१६ मा सिलिगुढी क्षेत्रमा उठाएको थियो। सो निर्वाचनमा पनि उनी सिपिआईका उम्मेदवार अशोक भट्टाचार्यसँग १४ हजार भोटले पराजित भए।
त्यसपछि गोर्खाल्याड विषयमा तृणमूलसँग मतभेद बढ्दै गएपछि उनले गत वर्ष पार्टी छाडेका थिए।
तृणमूलसँगको राजनीतिक यात्रा सकिएका सिक्किमका रैथाने भुटियाले यस वर्ष हाम्रो सिक्किम पार्टी गठन गरेर निर्वाचनमा होमिएका थिए।
